“Bayer Leverkuzen” Erik ten Haqla yollarını ayırdıqdan sonra ilk oyununu keçirib. Komandanın sükanı arxasına Danimarka millisindəki işi ilə tanınan Kasper Yulmand keçib. “Əczaçılar” Bundesliqanın yeni mövsümündə ilk qələbəsini qazanmaq üçün “Ayntraxt”ı qəbul ediblər.

Fasiləyədək leverkuzenlilər 2 qol vurdu və hər ikisi standart vəziyyətdən gəldi. Belə ki, 10-cu dəqiqədə Qrimaldo cərimə zərbəsindən gözəl qolla hesabı açdı. 45-ci dəqiqədə isə leverkuzenlilər penalti qazanaraq hesabı artırdılar – Patrik Şik fərqləndi. İlk hissə 2:0 hesabı ilə başa çatdı.

Fasilədən sonra “Ayntraxt” oyuna xeyli sürət gətirdi. İkinci hissə başlayan kimi Frankfurt təmsilçisi 52-ci dəqiqədə türkiyəli yarımmüdafiəçi Can Uzunla fərqi azaltmağa nail oldu – 2:1.

Cəmi 7 dəqiqə sonra meydan sahibləri azlıqda qaldı – Andrix ikinci sarı vərəqə ilə meydan qovuldu. Oyunun son dəqiqələrində isə yeni transfer İqnasiо Fernandez ikinci sarı vərəqə alaraq komandasını meydanda 9 nəfər qoydu. Buna baxmayaraq, “Ayntraxt” hesabı bərabərləşdirə bilmədi. Əksinə, son dəqiqədə Qrimaldo yenidən cərimə zərbəsindən fərqlənərək yekun nəticəni müəyyənləşdirdi – 3:1.

Beləliklə, Kasper Yulmand “Bayer”də qələbə ilə başladı. Frankfurt təmsilçisi isə yeni mövsümdə ilk məğlubiyyətini yaşadı.