Bu gün basketbol üzrə 20 yaşadək (U-20) qadınlardan ibarət Azərbaycan milli komandası Avropa çempionatının B divizionunda növbəti matçına çıxıb. Bolqarıstanın Samokov şəhərində təşkil olunan turnirdə millimiz 6-cı görüşünü keçirib.
Avropa çempionatının B divizionunda 9-14-cü yerlər uğrunda mübarizə aparan ölkəmizin U-20 qadın millisi növbəti matçında Rumıniya seçməsini 64:50 (16:9, 18:13, 12:10, 18:18) hesabı ilə məğlub edib. Bu vacib qələbədən sonra xal hesabını 7-yə çatdıran komandamız qrupda liderliyini sürdürür. Digər pillələri müvafiq olaraq Ukrayna (6 xal), İsveçrə (5 xal), Rumıniya (5 xal), Bosniya və Herseqovina (4 xal) və Albaniya (3 xal) tutur. Basketbolçularımız növbəti sınağına iyulun 12-də İsveçrə yığmasına qarşı çıxacaqlar
Xatırladaq ki, yığmamız bundan əvvəl A qrupunda İrlandiya (81:93), Albaniya (88:60) və Yunanıstanla (63:79) qarşılaşıb. Mərhələ oyunlarında isə basketbolçularımız Ukraynaya məğlub olub (58:79), Bosniya və Herseqovinanı isə üstələməyi bacarıblar (75:71).