AFFA İntizam Komitəsinin növbəti iclası keçirilib və Premyer Liqa, eləcə də aşağı dəstələrdə baş verən qayda pozuntuları ilə bağlı sərt qərarlar qəbul edilib.

İntizam Komitəsinin diqqət mərkəzində olan əsas məqamlardan biri oyunlardan sonra kənar şəxslərin meydana daxil olması hallarıdır.

“Qarabağ”la “Sabah”ın qarşılaşmasından sonra hər iki klubun azarkeşlərin meydana daxil olması səbəbindən həm Ağdam, həm də paytaxt təmsilçisi 5000 manat məbləğində cərimələnib. Qeyd edək ki, bu, cari mövsümdə ağdamlıların eyni xətaya görə üzləşdiyi ikinci analoji cəzadır.

“Turan-Tovuz”la oyundan sonra bənzər hadisə Naxçıvan təmsilçisinin də başına gəlib. Cari mövsümdə ikinci dəfə bu halla üzləşən klub 5000 manat cərimə ödəməli olacaq.

Paytaxt təmsilçisi təkcə azarkeş davranışına görə deyil, həm də oyunçu intizamsızlığına görə maliyyə itkisi ilə üzləşib.

Yarımmüdafiəçi Abdulah Xaybulayev kobud oyuna görə birbaşa qırmızı vərəqə alaraq meydandan qovulduğu üçün klub 1000 manat cərimələnib. Futbolçu özü isə 2 oyunluq diskvalifikasiya edilib.

Komandanın “sarı vərəqə” limitini aşması (limiti keçən “Xəbərdarlıqlar”) kluba əlavə 700 manata başa gəlib.

“Şamaxı” ilə matçın təşkilində nöqsanlara yol verən “Karvan-Yevlax”  1000 manat məbləğində cərimələnib. Cəzaya səbəb mətbuat konfransı otağının lazımi səviyyədə təşkil edilməməsi və digər texniki öhdəliklərin pozulmasıdır.

“Turan -Tovuz” və “Kəpəz” klubları futbolçularının vərəqə limitini aşması səbəbindən hər biri 700 manat məbləğində cərimələnib.

Aşağı dəstələrdə də qaydalardan kənara çıxan klublar cəzasız qalmayıb. II Liqa klubları “Kür-Araz” və “Dinamo” 23-cü tur çərçivəsində yol verdikləri müxtəlif qayda pozuntularına görə ümumilikdə 420 manat məbləğində cərimə olunublar.