İsveçrənin Bil şəhərində keçirilən ənənəvi şahmat festivalında Azərbaycan qrosmeysteri Aydın Süleymanlı uğurlu çıxışını davam etdirir. Mötəbər turnirin baş qrupu olan “Masters”də mübarizə aparan şahmatçımız növbəti mərhələyə vəsiqəni təmin edib.
Festival çərçivəsində bu gün blits yarışları baş tutub. Keçirilən 10 turdan sonra 5 xal toplayan Süleymanlı turnir cədvəlinin 3-cü pilləsində qərarlaşıb. Qeyd edək ki, təmsilçimiz bundan əvvəl təşkil olunan Fişer şahmatı (Şahmat-960) və rapid növlərinin hər ikisində gümüş medala sahib çıxmış, klassik şahmat yarışlarında isə hamını qabaqlayaraq 1-ci yeri tutmuşdu. Bütün növlərin yekununda ümumilikdə 21,5 xal toplayan Aydın Süleymanlı ümumi hesabatda 2-ci yeri tutub və mükafatlar uğrunda mübarizəni davam etdirəcək final mərhələsinə vəsiqə qazanıb. Dördlükdən ibarət həlledici mərhələdə şahmatçımızın rəqibləri Levon Aronyan, Yağız Kaan Erdoğmuş və Le Kuanq Lyem olacaq.