ABŞ prezidenti Donald Trampın müdaxiləsindən sonra FİFA-nın amerikalı hücumçu Folarin Boloqunun qırmızı vərəqəsini ləğv etməsi və onun Belçika ilə 1/8 final oyununda meydandaya çıxmasına icazə verməsi dünya futbolunda böyük qalmaqala yol açıb. Qurumun bu qərarı xüsusilə Almaniya mətbuatının sərt reaksiyası ilə qarşılanıb. Aparıcı idman icmalçıları FİFA prezidenti Canni Infantinonu dərhal istefaya çağırıb.

Almaniyanın nüfuzlu nəşrlərinin skandalla bağlı şərhləri:

“Die Welt” (Henninq Fayndt): Bu qərarı “idman dəyərlərinin ayaqlar altına atılması” kimi qiymətləndirən müəllif, Avropanın aparıcı futbol dövlətlərini (Almaniya, İngiltərə, Fransa, İspaniya) FİFA-ya qarşı üsyana çağırıb: “Avropa İnfantinonu dərhal devirməlidir. UEFA, İnfantino getməsə, FİFA-dan ayrılmaqla hədələməlidir. İyulun 19-da keçiriləcək finaldan sonra kuboku Tramp və İnfantinonun təqdim edəcəyi reallığı ilə barışmaq artıq qeyri-mümkündür”.

“Frankfurter Allgemeine Zeitung” (Kristof Bekker): Qərarı idman dünyası üçün “nüvə fəlakəti” ilə müqayisə edən yazar, FİFA-nın müstəqilliyinin itdiyini vurğulayıb: “Trampın bir zəngi ilə Boloqunun Belçikaya qarşı oynaması fəlakətdir. İndi gərək Almaniya kansleri Fridrix Merts də İnfantinoya zəng edib Paraqvayla oyunundakı penaltini ləğv etdirsin? Bu rəzalətə səssiz qalanlar idmana xəyanət edirlər”.

“Süddeutsche Zeitung” (Reymer Klüver): Nəşr bu hadisənin idmanı aşaraq Trampın yeni dünya nizamının bir göstəricisi olduğunu qeyd edib: “Trampın bir zəngi hakimin toxunulmazlığı qaydasını darmadağın etdi. Tramp komanda oyunçusu deyil, onun dünyasında qaydalar yox, güclünün dediyi keçərlidir. Bu qırmızı vərəqə skandalı, güclünün zəifləri cəzasız şəkildə əzə biləcəyinin növbəti iyrənc sübutudur”.

Qeyd edək ki, FİFA qaydalarına görə qırmızı vərəqə alan futbolçu növbəti oyunu mütləq buraxmalıdır. Hazırda bütün dünya futbol ictimaiyyətindən İnfantinonun bu “görünməmiş özbaşınalığına” qarşı genişmiqyaslı etirazlar dalğası gözlənilir.