Bu gün öllkəmizin avrokuboklardakı təmsilçiləri “Qarabağ” və “Sabah” üçün olduqca əhəmiyyətli bir gündür. İsveçrənin Nyon şəhərində futbol üzrə Avropa Liqasının 3-cü təsnifat mərhələsinin püşkatma mərasimi keçiriləcək. Bakı vaxtı ilə saat 15:00-da başlayacaq tədbirdə komandalarımızın turnirdəki potensial rəqibləri müəyyənləşəcək. Qeyd edək ki, bu mərhələnin ilk oyunları avqustun 6-da, cavab qarşılaşmaları isə avqustun 13-də baş tutacaq.

“Qarabağ”ın rəqib siyahısı yarıbayarı azaldı

Avropa Liqasının əsas yolunda mübarizə aparan və 2-ci mərhələdə Bolqarıstan ÇSKA-sı ilə qarşılaşacaq “Qarabağ” püşkatma öncəsi səpələnmişlər səbətində yer alıb. UEFA-nın coğrafi prinsiplərə və reytinqə əsasən komandaları altqruplara bölməsi nəticəsində “köhlən atlar”ın potensial rəqiblərinin sayı demək olar ki, iki dəfə azalıb.

Hazırkı mənzərəyə əsasən, Ağdam təmsilçisinin 3-cü mərhələdəki mümkün rəqibi bu üç variantdan biri olacaq:

“Şerif” (Moldova) – “Makkabi” (Təl-Əviv, İsrail) cütünün qalibi;

Çempionlar Liqasının 2-ci mərhələsində uduzan “Fənərbaxça” (Türkiyə) – “Qurnik” (Polşa) cütünün məğlubu;

Çempionlar Liqasının 2-ci mərhələsində uduzan “Şturm” (Avstriya) – “Harts” (Şotlandiya) cütünün məğlubu.

“Sabah” üçün Çempionlar yolu ssenarisi

Çempionlar Liqasının 2-ci təsnifat mərhələsində Finlandiyanın KuPS klubu ilə üz-üzə gələcək “Sabah” isə bu raundda uğursuzluqla üzləşəcəyi təqdirdə yoluna Avropa Liqasında davam edəcək. Turnirin Çempionlar yolunda mübarizə aparacaq paytaxt klubunun potensial rəqibləri də artıq bəllidir.

“Sabah” turnir dəyişəcəyi təqdirdə, Çempionlar Liqasının 2-ci mərhələsində məğlub olan bu cütlüklərdən biri ilə qarşılaşacaq:

“Omoniya” (Kipr) – “Kayrat” (Qazaxıstan)

“Larn” (Şimali İrlandiya) – “Tsrvena Zvezda” (Serbiya)

“Levski” (Bolqarıstan) – “Universitatya” (Krayova, Rumıniya)

İndi bütün diqqətlər saat 15:00-da Nyonda keçiriləcək püşkata yönəlib. Təmsilçilərimizə bu çətin yolda uğurlar arzulayırıq!