İstanbulda baş tutan UEFA Avropa Liqasının finalı tarixi anlarla yadda qalıb. İngiltərə təmsilçisi “Aston Villa” həlledici görüşdə Almaniyanın “Frayburq”unu böyük hesabla məğlub edərək, tarixində ilk dəfə bu nüfuzlu kuboka yiyələnib.

Gərgin mübarizə şəraitində keçən görüşün ilk yarısında ingilislər oyuna tam nəzarət ediblər. Yuri Tilemans və Emiliano Buendianın dəqiq zərbələri ilə “Aston Villa” fasiləyə rahat üstünlüklə yollanıb. İkinci hissədə də oyunun gedişatına nəzarəti əldən verməyən İngiltərə klubu Morqan Rocersin qolu ilə matçın yekun nəticəsini rəsmiləşdirib – 3:0.

Statistika və meydandakı mənzərə bu üstünlüyü tam təsdiqləyirdi. “Frayburq” qol epizodları yaratmağa çalışsa da, meydanda daha kompakt və dəqiq oynayan tərəf Emerinin yetirmələri olub. Bu qələbə Birmingem klubuna həm də növbəti mövsüm üçün UEFA Çempionlar Liqasına vəsiqə qazandırıb.

Sözügedən zəfər baş məşqçi Unay Emeri üçün xüsusi önəm daşıyır. İspaniyalı mütəxəssis karyerasında beşinci dəfə UEFA Avropa Liqasının kubokunu başı üzərinə qaldıraraq turnirin mütləq rekorduna imza atıb. (Bu göstərici üzrə ikinci pillədə üç qələbə ilə Covanni Trapattoni qərarlaşıb). Emeri buna qədər “Sevilya” (2014, 2015, 2016) və “Vilyarreal” (2021) ilə bu titula yiyələnmişdi. 2022-ci ilin noyabrından “Aston Villa”ya rəhbərlik edən təcrübəli məşqçi ilk dəfədir ki, özünün “sevimli” turnirini İspaniya deyil, başqa ölkənin klubu ilə qazanır.

“Squawka” nəşrinin məlumatına görə, bu uğurla ispaniyalı mütəxəssis ümumi avrokubok titullarının sayına görə (5) Karlo Ançelotti, Joze Mourinyo və Covanni Trapattoni kimi futbol dünyasının əfsanələri ilə eyni pilləyə yüksəlib.

UEFA Avropa Liqası, final

“Frayburq” (Almaniya) – “Aston Villa” (İngiltərə) 0:3

Qollar: Tilemans, 41. Buendia, 45+3. Rocers, 58.