Argentina millisi Lionel Messinin böyük futboldan gedişindən sonra yeni dönəmə hazırlaşır. “ESPN Argentina”nın məlumatına görə, baş məşqçi Lionel Skaloni əfsanəvi oyunçunun məşhur 10 nömrəli formasını kimin geyinəcəyinə qərar verib.

Bu şərəfli və məsuliyyətli missiya A Seriyasında çıxış edən 21 yaşlı hücumameyilli yarımmüdafiəçi Niko Pasa həvalə olunub.

Argentinada 10 nömrənin xüsusi çəkisi var – vaxtilə bu formanı Dieqo Maradona və Xuan Roman Rikelme kimi dahi futbolçular geyiniblər. Sonuncu sahibi Lionel Messi isə bu rəqəmi futbol tarixinə qızıl hərflərlə yazdırib. Onun gedişindən sonra bu nömrənin kimə verilməsi milli komandada nəsillərin dəyişməsi planının əsas tərkib hissələrindən biri idi.

“Real”dan ayrıldıqdan sonra karyerasını “Komo”da davam etdirən Niko Pas A Seriyasındakı parlaq oyunu ilə Skaloninin etimadını qazanıb.

Ötən mövsüm 13 qol və 7 məhsuldar ötürmə ilə yadda qalan gənc istedadın kreativliyi, xəttlərarsı oynamaq bacarığı və meydandakı liderlik keyfiyyətləri Skalonini məhz onun üzərində dayanmağa vadar edib. Lakin bu dəyişiklik təkcə Messinin gedişi ilə məhdudlaşmır. Nikolas Otamendi başda olmaqla bir neçə təcrübəli oyunçu da milli komandadakı karyerasını başa vurub. Skaloni komandanın oyun keyfiyyətini yeni səviyyəyə qaldıracaq gəncləşmə prosesini daha da sürətləndirir.