Almaniya Futbol İttifaqı (DFB) ard-arda ağır zərbələr almaqdadır. İyulun 1-i, çərşənbə günü milli komandanın dünya çempionatından gözlənilməz rüsvayçı gedişindən dərhal sonra, qurum daha bir ciddi böhranla üzləşib. Frankfurt polisi, “Avro-2024” zamanı VIP biletlərin qanunsuz paylanması şübhəsi ilə DFB-nin baş qərargahında axtarış aparıb.

DFB-nin rəsmi bəyanatında bu məsələdə qurumun hədəf olmadığı vurğulanır: “Bu təhqiqat DFB-yə bir təşkilat olaraq, yaxud onun hər hansı bir əməkdaşına qarşı yönəlməyib. DFB bu işdə sırf şahid qismində iştirak edir və hüquq-mühafizə orqanları ilə tam əməkdaşlıq edir”.

İstintaq materiallarına görə, əsas şübhəlilər 66 yaşlı bir alman və 46 yaşlı bir fransa vətəndaşıdır. Söhbət turnir ərəfəsində xüsusi qonaqlara otel yerlərinin və minlərlə qanunsuz biletin paylanmasından – yəni mütəşəkkil korrupsiya və vəzifə səlahiyyətlərindən sui-istifadədən gedir. Skandalın miqyasının ölkə daxilindəki bir çox yerli məmurlara qədər uzandığı ehtimal olunur.

46 yaşlı fransız koordinatorun “Euro 2024 GmbH” birgə müəssisəsində ev sahibi şəhərlərlə əlaqələrə cavabdeh olub. Onun turnirin təşkilatçı şəhərlərindəki rəhbər şəxsləri top-oyunlara qanunsuz dəvət etdiyi bildirilir.

66 yaşlı alman məmuru isə Münhendə keçirilən İspaniya — Fransa yarımfinal matçına qanunsuz bilet, yol və otel xərcləri daxil olmaqla, ümumilikdə 2400 avro dəyərində “hədiyyə” almaqda ittiham olunur. Gelzenkirxen şəhərinin keçmiş idarəçi əməkdaşı olan bu şəxsin evi artıq axtarılıb. Qeyd edək ki, o, daha əvvəl də dələduzluq və mənimsəmə hallarına görə saxlanılıb və hazırda dövlət qulluqçusu deyil.

Müstəntiqlər hesab edirlər ki, Gelzenkirxendəki bu fakt aysberqin yalnız görünən tərəfidir və bənzər rüşvət halları kütləvi xarakter daşıyıb. Hazırda cinayət işi üzrə araşdırmalar davam edir.