DÇ-2026-nın qrup mərhələsinin II turu çərçivəsində Sietldakı “Lumen Field” stadionunda keçirilən ABŞ – Avstraliya matçı hər iki komanda üçün böyük əhəmiyyət kəsb edirdi. İlk turda qələbə qazanan tərəflər üçün bu qarşılaşmadakı 3 xal vaxtından əvvəl pley-off mərhələsinə vəsiqə demək idi.
Mavrisio Poçettinonun yetirmələri ilk oyunda Paraqvaya qarşı parlaq kombinasiyalı hücumlar və aqressiv pressinqlə yadda qalmışdısa, Avstraliya Türkiyə ilə matçda mükəmməl “avtobus” taktikası və öldürücü əks-hücumlar nümayiş etdirmişdi. Sietldakı oyun həm də bu fərqli üslubların sabitliyini yoxlamaq üçün bir sınaq idi.
Matçın ilk hissəsində “Sokkeruz” (Avstraliya millisi) top rəqibdə olarkən yüksək pressinqlə meydan sahiblərini təəccübləndirməyə çalışsa da, ABŞ millisi buna hazır idi. Paraqvayın da analoji taktikasını asanlıqla iflasa uğradan “ulduzlu-zolaqlılar”, Avstraliyanın müdafiə xəttini kombinasiyalı ötürmələrlə yararaq təhlükəli hücumları məntiqli sonluqla bitirməyi bacardılar.
Nəticədə ABŞ millisi Avstraliyanı 2:0 hesabı ilə məğlub edərək növbəti mərhələyə vəsiqəni təmin etdi. Qarşılaşmada qolları 11-ci dəqiqədə Kemeron Bercess (öz qapısına) və 43-cü dəqiqədə VAR baxışından sonra baş hakim tərəfindən qeydə alınan Aleks Frimen vurdu. İkinci hissədəki cəsarətli oyununa baxmayaraq, Avstraliya təsəlli qolunu belə vura bilmədi.
İndi amerikalılara qrup liderliyini rəsmiləşdirmək üçün Türkiyə ilə son matçda cəmi 1 xal (heç-heçə) bəs edir.
Yeri gəlmişkən, bu qələbə ilə ABŞ millisi futbol tarixinə yeni bir səhifə yazıb. Belə ki, “ulduzlu-zolaqlılar” dünya çempionatlarında bundan əvvəlki ardıcıl iki qələbəsini düz 96 il öncə — 1930-cu ildə baş tutan ilk mundialda qazanıblar. Tarixdəki həmin ilk dünya birinciliyində amerikalılar Belçika və Paraqvay yığmalarını eyni hesabla (3:0) məğlub etmişdilər.
Dünya Kuboku. D qrupu, 2-ci tur
ABŞ – Avstraliya 2:0
Qollar: Bercess, 11 (avtoqol), Frimen, 43
ABŞ: Fris, Frimen, Riçards, Rim, Robinson (Trasti, 81), Tilman, Adams, Dest (Skalli, 81), Makkenni (Reyna, 96), Pepi (Berhalter, 74), Balogun (Rayt, 96).
Avstraliya: Biç, İtalyano, Çirkati, Suttar, Bercess (Ceriya, 46), Bos, Leki (Volpato, 61), O’Nill, Okon-Engstler (İrvin, 78), Velupillay (Metkaf, 46), Ture (İrakunda, 46).
Xəbərdarlıqlar: Robinson (56), Balogun (89), Riçards (93) – Bos (16), Çirkati (32), Suttar (89), İtalyano (89).
Baş hakim: Feliks Svayer (Almaniya).
Stadion: “Lumen Field” (Sietl, ABŞ).