Ölkə futbolunda növbəti bir “dağılan klub” ssenarisi yaşanır. Bu dəfə təhlükə siqnalı şimal zonası – Qubadan gəlir. Sabiq prezident Ayaz Abdullayevin gedişi ilə başlayan böhran artıq kulminasiya nöqtəsinə çatıb: komanda 2-ci liqada “Araz-Saatlı” ilə oyuna çıxa bilmir.

Məsələ sadəcə qələbə və ya məğlubiyyət deyil. Məsələ, bir rayonun futbol kimliyinin yox olmasıdır. Klubun rəsmi bəyanatından bəlli olur ki, futbolçular aylardır maaşsız, sadəcə “şəhər naminə” mübarizə aparırlar. Lakin nəqliyyat xərclərini belə qarşılaya bilməyən bir komandadan peşəkarlıq gözləmək absurddur. “Quba”nın bugünkü durumu təkcə maliyyə yox, həm də idarəçilik böhranıdır. Əgər bu gün hər hansı bir dəstək gəlməsə, sabah futbolmuzun xəritəsindən daha bir ad silinəcək.

Quba futbolu ölməsin: “Bəzən istək kifayət etmir…”

“Quba” FK-nın son müraciəti ürək ağrıdır. “Yazmaq bizim üçün çox ağırdır” deyə başlayan o sətirlərdə bir komandanın ümidi, gənclərin arzusu və çıxılmazlıq var. Təsəvvür edin, futbolçular meydana çıxmaq, döyüşmək istəyir, amma onları stadiona aparacaq avtobusa yanacaq tapılmır.Bu komanda kimindir? Təkcə futbolçuların? Xeyr, bu komanda hər bir qubalınındır, hər bir futbolsevərindir. Klub rəhbərliyinin “kimin nəyə gücü çatırsa” çağırışı əslində bir imtahandır. Bu, birliyin, həmrəyliyin imtahanıdır. Balaca bir yardım böyük bir tarixi xilas edə bilər. Gəlin, “Quba”nın yaşıl meydanlardakı səsini boğmağa imkan verməyək. Bu gün dəstək olmasaq, sabah xatirələrdən başqa heç nə qalmayacaq.