Taylandın paytaxtı Banqkok şəhəri 3×3 basketbol üzrə FİBA Çempionlar Kubokuna ev sahibliyi edib. Gərgin keçən turnirdə ölkəmizi təmsil edən qadınlardan ibarət millimiz yüksək nəticə göstərərək fəxri kürsüyə qalxıb.
Heyəti Erika Karter, Tatyana Deniskina, Aleksandra Mollenhauer və Brianna Freyzerdən ibarət olan yığmamız turnirin qrup mərhələsində inamlı oyun nümayiş etdirib. B qrupunda yer alan yığmamız Kanada (10:16), ev sahibi Tayland (21:8) və İspaniya (16:11) seçmələri ilə qarşılaşıb. Bu nəticələrlə qrupu ikinci pillədə başa vuran basketbolçularımız yarımfinala vəsiqə qazanıblar.
Yarımfinal mərhələsində qızlarmız dünyanın ən güclü komandalarından biri olan ABŞ seçməsi ilə üz-üzə gəlib. Dramatik mübarizə şəraitində keçən qarşılaşmada basketbolçularımız 22:20 hesablı əzmkar qələbə qazanaraq adlarını finala yazdırıblar.
Çempionluq uğrunda həlledici matçda Niderland yığması ilə qarşılaşan təmsilçilərimiz bu dəfə rəqibin müqavimətini qıra bilməyiblər (12:21). Beləliklə, millimiz turniri ikinci pillədə tamamlayaraq gümüş medallara sahib çıxıb.
Qeyd edək ki, Çempionlar Kubokunun qalibi 2027-ci ildə keçiriləcək Dünya Kubokuna, növbəti Çempionlar Kubokuna və 2028-ci il Los-Anceles Yay Olimpiya Oyunlarının təsnifat turnirinə birbaşa vəsiqə əldə edib.