Avropa çempionunun DÇ-nin ilk turunda Kabo-Verde yığması ilə sensasiyalı heç-heçəsi İspaniyada böyük qəzəb və şok effekti yaradıb. “Polsat Mundial Cast” proqramında çıxış edən tanınmış ekspert Pyotr Urban “ Furia Roja”nın (“Qırmızı qəzəb”) əsas problemini açıqlayaraq baş verənləri kəskin tənqid edib: “Bu, sadəcə uğursuzluq deyil, böyük bir səhv, tarixi bir uğursuzluqdur”.

Xəbərin təfərrüatları isə yığma daxilindəki ciddi taktiki böhrandan xəbər verir. Urbanın fikrincə, Kabo-Verde ilə matçda ispanların sadəcə bəxti gətirməyib demək bəraət olardı. Komanda meydanda tamamilə sönük və fəaliyyətsiz görünüb: “Bu, yığmanın sadəcə şanssızlıq ucbatından xal itirdiyi oyunlardan deyildi. Onlar meydanda yorucu, darıxdırıcı və heç bir effekti olmayan köhnə üslublu bir “tiki-taka” nümayiş etdirdilər”.

Ekspert hesab edir ki, İspaniya yığması hazırda çox ciddi bir problemlə üz-üzədir. Maraqlıdır ki, məhz bu amil komandanın son Avropa çempionatındakı möhtəşəm çempionluğunun əsas hərəkətverici qüvvəsi idi. Söhbət cinah hücumlarının kəsərindən gedir: “Cinah oyunçuları olmadan İspaniya millisinin hansı günə düşdüyünü hamımız gördük. Heyətdə Lamin Yamal və Niko Uilyams kimi vunderkindlər olanda və onlar optimal formalarındadırsa, bu komanda tamamilə başqalaşır – dinamik, aqressiv, sürətli və qol epizodlarında ölümcül olur. Bu oyunçuların təsiri dərhal hiss olunur. Əks halda isə Kabo Verde ilə matçda şahidi olduğumuz eyni ssenari təkrarlanır: topa sonsuz nəzarət, lakin sıfır effektivlik”.