Ağdam təmsilçisində Aleksey Kaşukdan sonra daha bir aparıcı simanın gedişi gündəmə gəlib. Kaşukun yayda komandadan ayrılacağı ilə bağlı xəbərlərin ardınca, hücum xəttinin əsas simalarından olan Leandro Andradenin də gələcək taleyi sual altına düşüb.

Karyerasında yeni səhifə açmaq niyyətində olan 26 yaşlı portuqaliyalı vinger, hazırda Çin və Yaponiya klublarından gələn təklifləri ciddi şəkildə dəyərləndirir. Andradenin “atlılar”la 2027-ci ilə qədər qüvvədə olan müqaviləsi olduğu üçün, potensial alıcılar transfer məbləği məsələsində Ağdam təmsilçisi ilə ortaq məxrəcə gəlməli olacaqlar.

Eyni vaxtda iki əsas cinah oyunçusunun — Kaşuk və Andradenin gediş ehtimalı baş məşqçi Qurban Qurbanovu transfer siyasətinə yenidən baxmağa məcbur edir. Bu itkilər yay transfer pəncərəsində daha keyfiyyətli və kreativ hücumçuların axtarışını zəruri hala gətirib.

“Qarabağ” rəhbərliyi adətən futbolçuların karyera yüksəlişinə mane olmasa da, komandanın növbəti mövsümdəki Avrokubok iddiaları fonunda yaranacaq boşluğun necə doldurulacağı azarkeşlər üçün böyük maraq doğurur. Görünən odur ki, Ağdam klubu yayda hücum xəttini əsaslı şəkildə yeniləməli olacaq.