Ötən turda “Qəbələ”ni darmadağın edərək 3-cü pillədəki mövqeyini möhkəmləndirən “Turan-Tovuz”, bu dəfə azarkeşlərini sevindirə bilmədi. Avrokubok yolunda vacib xallar toplamağa çalışan Tovuz təmsilçisi, autsayder qismində çıxış edən “İmişli” səddini aşa bilmədi.
Matçdan öncə mütəxəssislər Qurban Berdiyevin yetirmələrini aşkar favorit hesab edirdilər. Xüsusilə “İmişli”nin 9 turdur qələbə qazanmaması bu ehtimalı gücləndirirdi. Lakin Jorje Kaşkiilyanın komandası Tovuzda əsl xarakter nümayiş etdirdi.
İlk hissə ehtiyatlı oyunla yadda qaldı. Tovuzlular hücumda kəsərli ola bilmədilər, qonaqlar isə əks-hücumlarda təhlükə yaratmağa çalışırdılar.
İkinci yarıda Berdiyev hücumu gücləndirmək üçün Jo və Coş Ginnelli kimi oyunçuları meydana buraxsa də, “İmişli”nin müdafiə xətti və qapıçı Andrey Sinenka etibarlı oyunu ilə qapısını toxunulmaz saxladı.
Oyun kifayət qədər gərgin keçdi, bunu hakim Fərid Hacıyevin göstərdiyi sarı vərəqələrin sayından da görmək olar. Xüsusilə oyunun son dəqiqələrində hər iki komanda ehtiyatlı davranmağa məcbur idi
“Turan-Tovuz” bu bərabərliklə 3-cü pillədə qalsa da, rəqibləri ilə xal fərqini daha da açmaq şansını əldən verdi.
TURAN TOVUZ – İMİŞLİ 0:0
Baş hakim: Fərid Hacıyev.
“Turan-Tovuz”: Sergey Samok, Filip Ozobiç (Roberto Olabe, 83), Rəhim Sadıxov, Ayxan Hüseynov (Coş Ginnelli, 83), Roderik Miller, Enrike Silva, Alexandro Serrano, İbrahima Vadji (Jo, 46), Emmanuel Hakman (k), Hayderson Hurtado, Jorje Silva.
“İmişli”: Andrey Sinenka, Azər Salahlı (k), İdris İnqilablı (Həzrət İsayev, 90+2), Rafael Vieqas, Nikola Karaklayiç (Abbas Ağazadə, 80), Edvin Banquera, Ronaldo Rodriqes, Dioqu Almeyda, Dioqu Rollo, Ezekiyel Morqan, Juninyo (Dioqu Kardozu, 63).
Sarı vərəqələr: Hakman, 30. Karaklayiç, 70. Enrike Silva, 77. Jorje Silva, 86. Ronaldo Rodriqes, 90+3.