Türkiyə və Səudiyyə Ərəbistanı futbol dünyasının diqqəti “Fənərbaxça” və “Əl-İttihad” arasındakı irimiqyaslı transfer əməliyyatına yönəlib. Yussef En-Nesirinin Səudiyyə klubuna transferi, dünya ulduzu N’Qolo Kantenin İstanbula gəlişi üçün “yaşıl işıq” yandırıb.
Transfer pəncərəsinin ən hərəkətli günlərini yaşayan “Fənərbaxça”da gözlənilməz gəlişmələr bir-birini əvəz edir. Sarı-lacivərdli klubun mərakeşli hücumçusu Yussef En-Nesiri karyerasını Səudiyyə Ərəbistanında davam etdirməyə hazırlaşır. Jurnalist Yağız Sabuncuoğlunun məlumata görə, ulduz futbolçu “Əl-İttihad”ın cəlbedici təklifinə artıq müsbət cavab verib. Hazırda transferin rəsmiləşməsi üçün Səudiyyə Peşəkar Liqası rəhbərliyinin son təsdiqi gözlənilir.
“Fənərbaxça” rəhbərliyi En-Nesiri üçün masaya oturduğu “Əl-İttihad” qarşısında konkret şərt qoyub. İstanbul təmsilçisi, hücumçusunun gedişinə yalnız bir şərtlə icazə verəcəyini bildirib: N’Qolo Kantenin transferi. Aparılan intensiv danışıqlar öz bəhrəsini verib. Tərəflər 34 yaşlı fransız yarımmüdafiəçinin transferi üçün 4 milyon avro təzminat məbləğində böyük ölçüdə razılığa gəliblər. “Fənərbaxça”nın dünya çempionu ilə 2,5 illik rəsmi müqavilə imzalayacağı gözlənilir.
Maraqlıdır ki, “Əl-İttihad”ın “Əl-Nacma” ilə keçirdiyi son qarşılaşmada Kante heyətdə yer almayıb. Klub bunu oyunçunun zədəli olması ilə əsaslandırsa da, Səudiyyə mətbuatı fərqli iddia ilə çıxış edir. Yerli medianın yazdığına görə, Kante transfer prosesi yekunlaşmaq üzrə olduğu üçün hər hansı riskə yol verməmək məqsədilə meydandan uzaq tutulur.
Gündəmin digər şok xəbəri isə Fredlə bağlıdır. Məlumata görə, “Fənərbaxça” braziliyalı ulduzu da “Əl-İttihad”a təklif edib. Əgər 32 yaşlı Fred Səudiyyə təmsilçisi ilə şəxsi müqavilə şərtlərində anlaşarsa, “Fənərbaxça” bu keçidə də mane olmayacaq. Bu gəlişmə, sarı-lacivərdlilərin orta xəttini tamamilə yeniləmək planından xəbər verir.
Bu transfer zəncirinin yaxın günlərdə rəsmən elan ediləcəyi və hər iki komandanın heyətində ciddi dəyişikliklərin baş verəcəyi gözlənilir.