Niderlandın Veyk-an-Zee şəhərində şahmat dünyasının “Uimbldonu” hesab edilən nüfuzlu “Tata Steel Chess” festivalı çərçivəsində keçirilən “Challengers” turniri yekunlaşıb. Qrosmeystermiz Aydın Süleymanlı yarışın böyük hissəsini liderlər qrupunda keçirsə də, final mərhələsi dramatik anlarla yadda qalıb.

Turnirin sonuncu — 13-cü turunda Aydın Süleymanlı serbiyalı rəqibi Velimir İviçlə qarşılaşıb. Təəssüf ki, bu həlledici partiyada məğlub olan şahmatçımız çempionluq və “Masters” qrupuna vəsiqə qazanmaq şansını əldən verib. Turniri 9 xalla tamamlayan Süleymanlı, əlavə göstəricilərə görə fəxri kürsünün 3-cü pilləsində qərarlaşıb.

Qeyd edək ki, “Challengers” qrupunun qalibi olan Hindistan təmsilçisi Leon Lyuk Mendonka, reqlamentə əsasən, növbəti il dünyanın ən güclü şahmatçılarının mübarizə apardığı elit “Tata Steel Masters” turnirinə birbaşa vəsiqə qazanıb.

Aydın Süleymanlı turnir ərzində nümayiş etdirdiyi əzmkar oyunla bir neçə parlaq qələbə qazanaraq beynəlxalq mütəxəssislərin diqqətini cəlb etməyi bacarıb. Üçüncü yer belə güclü heyətin toplandığı turnirdə gənc qrosmeysterimiz üçün böyük təcrübə və uğurlu göstərici hesab olunur.