İngiltərə mətbuatı “Mançester Yunayted”in “Real”ın ulduz futbolçusu Arda Gülərin adını transfer siyahısına daxil etdiyini yazıb. Deyilənə görə, klubun baş məşqçisi Ruben Amorim Güləri “prioritet transfer hədəfi” kimi müəyyənləşdirib və artıq bu yöndə iki klub arasında ilkin təmasların başladığı bildirilir. “CaughtOffSide” nəşrinin məlumatına görə, “Mançester Yunayted” artıq Arda Güləri heyətinə qatmağı planlaşdırır. Əgər bu transfer baş tutarsa, Arda Gülər karyerasında yeni bir səhifə açmış olacaq.

2023-cü il yay transfer pəncərəsində “Barselona”nın təklifini rədd edərək “Real”la müqavilə imzalayan orta sahə oyunçusu, Avropa futbolunun gündəmindən düşmür. Belə ki, “Kral klub”unun formasını geyinən Arda Gülər göstərdiyi oyunu ilə nəhənglərin diqqətini çəkməkdə davam edir. Gənc yaşına baxmayaraq, milli futbolçu Avropa nəhənglərin diqqət mərkəzindədir. Türkiyə millisinin 20 yaşlı yarımmüdafiəçi “Real”da bütün turnirlərdə 83 rəsmi matça çıxıb, 15 qol vurub və 18 məhsuldar ötürmə edib. Bu da onun yüksək səviyyədəki potensialını sübut edən ciddi göstəricidir.