Serbiyanın Novi Sad şəhərində keçirilən Yunan-Roma güləşi üzrə U23-lərin dünya çempionatında 63 kiloqram çəki dərəcəsində çıxış edən Ziya Babaşov finalda moldovalı Vitali Yeryomenkonu 6:3 hesabı ilə məğlub edərək qızıl medal qazanıb.
Turnirdə daha dörd çəkidə mübarizəyə start verilib. Təmsilçimiz Elmir Əliyev (55 kiloqram) 1/8 final mərhələsini maneəsiz keçib. Belə ki, onun alban rəqibi Andi Muka xalçaya çıxmayıb. Güləşçimiz daha sonra çinli Baoji Vuya (9:0) və özbəkistanlı Xociəkbər Kuçkarova (4:2) qalib gəlib. Elmir yarımfinalda iranlı Armin Şamsipurhacını “tuş”la finala gedən yolundan kənarlaşdırıb. Sabah həlledici görüşdə Əliyev rusiyalı Alibek Amirovla güləşəcək.
Hindistanlı Nişantı (8:3) və qırğızıstanlı Bayaman Kərimovla (4:1) mübarizədən qalib ayrılan Fəraim Mustafayev (67 kiloqram) 1/4 finalda belarus Qleb Makarankaya minimal fərqlə (3:4) yenilib. Ruslan Nurullayev (72 kq) yapon Hacime Kikutaya aşkar üstünlüklə (8:0), moldovalı Vasile Zabikaya isə 4:0 hesabı yenərək 1/4 finala yüksəlib. Ruslan növbəti mərhələdə iranlı İman Məhəmmədiyə məğlub olub – 3:5. Rəqib finala çıxdığı üçün Nurullayev sabah təsəlliverici görüşdə ukraynalı Oleq Xəlilov və macar Mate Veq cütünün qalibi ilə qarşılaşacaq.
Əli Quliyev (97 kiloqram) təsnifat mərhələsində rusiyalı Maksim Averinə uduzaraq (1:5) turnirdə çıxışını başa vurub.