İlk oyunda ümumi qələbə üçün ciddi fərq yaradan “Qarabağ” cavab oyununa o qədər də yaxşı başlamadı. Uzun zaman bir yerdə oynamaqlarına baxmayaraq müdafiəçilər mövqe səhvinə yol verdilər və Macarıstan klubu erkən qol vura bildi. Bu epizodda Mustafazadə, Media və Mateus Silva nə rəqiblə oynamaqda, nə də zamanında süni ofsayd yaratmaqda vahid ansambl kimi çıxış edə bilmədilər. Cəfərquliyev is nə işlə məşğul idi, məlum deyildi. Qoldan sonra da ağdamlılar bir müddət toparlanmaqda çətinlik çəkdilər və yalnız bəxtin sayəsində qapımızda qol görmədik. Xoşbəxtlikdən 25-ci dəqiqədə əks-hücum qolla nəticələndi. Nəriman Axundzadə bu epizodda yaxşı oynadı, sol cinahda rəqibi keçərək Andradeyə bariz qol imkanı yaratdı. Buna qədər səhvləri ilə yadda qalan Andrade dəqiq zərbə ilə hesabı bərabərləşdirdi və komandada yaranmış qısamüddətli təşvişi aradan qaldıra bildi. Bundan sonra Qurban Qurbanovun yetirmələri daha rahat oynadı və fasilə ərəfəsində Andrade yenidən səhnəyə çıxdı. Bu dəfə onun fərdi ustalığı və dəqiq ötürməsi ilə Zubir komandasını hesabda irəli çıxardı.

“Qarabağ” ikinci hissəyə də yaxşı başlamadı. Medina növbəti dəfə texnikasının olmamasının qurbanı oldu və adi vəziyətdə top əvəzinə rəqibin ayağına təpik endirdi. Varqa penalti ilə hesabı bərabərləşdirdi. Oyun getdikcə “Qarabağ”ın oyunçuları açıq-aşkar yoruldular. Bu səbəbdən də nə sürətli hücum qura bilir, nə də mübarizələrdən qalib çıxırdı. Bu cür mənzərə uzun zaman sürsə də, Qurbanov inadkarcasına dəyişiklik etmədi və nəticədə macarlar daha bir qol vuraraq intriqanı daha da artırdı. Son dəqiqələr macarların təzyiqi altında keçdi. Koxalski əla seyv ilə qonaqların qoluna mane oldu. Validol qoxulu oyunun sonu “Qarabağ” tab gətirə bildi və Qurbanovun komandası yenidən mötəbər turnirin əsas mərhələsinə yüksəldi. Çətin oldu, səhvlər oldu, amma nəticə uğurlu oldu. Səkkiz ildən sonra Ağdam klubu yenidən Avropanın aparıcı liqasında mübarizə aparacaq.

UEFA Çempionlar Liqası, Pley-off mərhələsi, cavab oyunu

Qarabağ – Ferentsvaroş (ilk oyun 3:1)

“Qarabağ”: Koxalski, Cəfərquliyev (Bayramov, 84), Mustafazadə, Medina, Mateus Silva, Bedro Bikalyo, Yankoviç, Kadi Borges (Kaşuk, 90+4), Zubir (Kuaku, 84), Leandro Andrade (Addai, 69), Axundzadə (Qurbanlı, 90+4).

“Ferentsvaroş”: Dibuş, Odovda (Naqi, 69), Raemaekers, İbrahim Sisse, Makrekis, Keyta (Tot, 74), Ötvös (Pasiç, 46), Conatan Levi (Kadu, 46), Lenni Jozef (Qrüber, 74), Kaniçovski, Barnabas Varqa.

Qollar: Jozef, 12 (0:1). Leandro Andrade, 25 (1:1). Zubir, 45 (2:1). Varqa, 55-p. (2:2). Tot, 82 (2:3).