Azərbaycan millisinin hücumçusu Renat Dadaşov karyerasını Ukraynada davam etdirəcək.
27 yaşlı futbolçu yerli “Bukovina” klubu ilə bir illik müqavilə imzalayıb. Anlaşmada sözləşmənin daha bir il uzadılması üçün seçim hüququ da nəzərdə tutulub.
Forvard yeni komandasında 9 nömrəli forma ilə çıxış edəcək.
“Bukovina” Ukrayna Premyer Liqasında keçirdiyi 5 turdan sonra 6 xalla 8-ci pillədə qərarlaşıb.
Dadaşovun “Bukovina”ya transferindən sonra klubun rəsmi saytına verdiyi müsahibəni təqdim edirik:
– Renat, kluba xoş gəlmisən! “Bukovina”nın səninlə maraqlandığını ilk dəfə nə vaxt öyrəndin və proses necə davam etdi?
– Əvvəlcə menecerim zəng edib dedi: “Dinlə, Ukraynada bir variant var. Səninlə maraqlanırlar. Nə düşünürsən?” O, klubun adını çəkdikdən sonra “Bukovina” haqqında məlumat toplamağa başladım. Klub nümayəndələri ilə danışdım və bu komandaya qoşulmaq ideyası xoşuma gəldi. Baş məşqçinin baxış bucağı, oyun modeli və gördüyü işlər məni heyran etdi. Keçidə hazırlaşarkən “Bukovina”nın bir çox oyununu izlədim və klubun məni heyətində görməyi nə qədər çox istədiyini hiss edərək əsl ilham aldım. Səmimi desəm, bu, məni çox təəccübləndirdi. Və budur, artıq buradayam.
– Səni məhz “Bukovina” ilə müqavilə imzalamağa inandıran nə oldu?
– Məşqçilər korpusunun yanaşması və klubdakı insanların münasibəti. Buraya gəlməyim üçün hər şeyi yüz faiz etdikləri üçün dərhal məhz bu klubda olmalı olduğumu hiss etdim. Qərarıma o qədər əmin idim ki, dərhal müqavilə imzaladım. Burada – “Bukovina”nın heyətində olmaqdan xoşbəxtəm!
– Etiraf edək ki, klubumuzun heyətində milli komandanın hazırkı futbolçusunu görmək diqqətçəkən hadisədir. Beynəlxalq təcrübən – Azərbaycan millisində keçirdiyin 45 oyun və vurduğun 7 qol komandamıza necə kömək edəcək?
– Milli komanda və klub tamamilə fərqli anlayışlardır. Çoxları bunların eyni olduğunu düşünür, lakin bu, belə deyil. Millidə ölkəni təmsil edirsən, klubda isə hər gün çalışırsan. Mən “Bukovina”da da milli komandada olduğu kimi özümün ən yaxşı versiyam olmağa çalışacağam. Əlbəttə ki, güclü millilərə və futbolçulara qarşı oynayarkən qazandığım təcrübəni kluba da daşıya bilərəm. Orada ən yüksək səviyyəli oyunçulara qarşı 90 dəqiqə ərzində konsentrasiyanı qorumağı öyrənirsən. Beləliklə, yığmadakı bu təcrübəmi yeni komandama köçürmək və “Bukovina”nın rəngləri uğrunda meydanda döyüşmək istəyirəm.
– Beynəlxalq karyerandakı xüsusi anlardan biri də ötən ilin noyabrında Fransa millisinin qapısına vurduğun qoldur. Həmin matçı və qoldan sonra yaşadığın emosiyaları xatırlayaq.
– Əlbəttə, hər şeyi detalları ilə xatırlayıram. Matçın dördüncü dəqiqəsi idi – Fransanın qapısına yol tapıb hesabı 1:0 etdim. Emosiyalar və adrenalin səviyyəsi həddindən artıq yüksək idi! Lakin dərhal başımdan belə bir fikir keçdi: “Ey Tanrım, hələ fransızlara qarşı təxminən 90 dəqiqə oynamalıyıq!” (Gülümsəyir.) Mənim üçün bütün qollar xüsusidir, lakin bu, həqiqətən də bənzərsizdir. Çünki oyun Azərbaycanda keçirilirdi və bu, yığmamızın Fransa ilə oyunlarda tarixdə vurduğu ilk qol idi. Bu, möhtəşəm təcrübə idi, belə şeylər unudulmur.
– Azərbaycan millisinin heyətində başqa hansı qol və ya qollar sənin üçün daha unudulmazdır?
– Düzünü desəm, hər bir qol mənim üçün vacib və unudulmazdır. Çünki ailənin gəldiyi ölkə, köklərinə bağlı olduğun Vətən üçün qol vurursan. Almaniyada doğulsam da, özümü əsl azərbaycanlı hiss edirəm. Ən yaddaqalan kimi, şübhəsiz ki, milli komandadakı ilk qolumu – Slovakiyanın qapısına vurduğum topu qeyd edərdim. Həmçinin Fransaya vurduğum qol. Bu iki top milli komandada vurduğum yeddi qol arasında zirvədədir. Ümid edirəm ki, davamı gələcək.
– Tam bir il əvvəl Azərbaycan millisinin heyətində Ukraynaya qarşı oynamışdın. 12 ay sonra bu ölkəyə köçəcəyini o zaman ağlına gətirə bilərdinmi?
– Düzünü desəm? Xeyr. Amma futbolu məhz buna görə sevirəm: sabah harada olacağını heç vaxt bilmirsən. Bu, heyrətamiz təsadüfdür. Ukrayna millisinə qarşı keçirdiyim matçı çox yaxşı xatırlayıram və bu gün gözəl sarı rəngləri olan klubla müqavilə imzalayıram. Bu, həqiqətən də çox əladır!
– Almaniyada doğulub böyüdüyün üçün səni alman mentalitetinə malik azərbaycanlı adlandırmaq olar. Alman futbol mühiti formalaşmağına nə dərəcədə təsir edib?
– Məni tamamilə o mühit formalaşdırıb. 15 yaşımda akademiyaya köçdüm. Orada sərt intizam və ağır zəhmət öyrədirlər. Səhər məşqlərini məktəbdə təhsillə birləşdirirsən, sonra yenidən məşqə gedirsən, axşam isə yenə dərslər. Bu, məni bugünkü futbolçu kimi formalaşdıran böyük intizam tələb edirdi.
– U-17 Almaniya yığmasında Kay Havertslə birlikdə bir çox oyun keçirmisiniz. Həmin dövrdən yaddaşında nə qalıb?
– O vaxtlar sadəcə uşaq idik və karyeramızın necə qurulacağını bilmirdik. Gənclər futbolundan zövq alır, məhz Azərbaycanda keçirilən Avropa çempionatının seçmə mərhələsində oynayırdıq. Kay Haverts birlikdə oynamağa başladığımız vaxtdan həmişə əla futbolçu olub. O, inanılmaz karyera qurub və qurmaqda davam edir. Kay əla oğlan və yüksək səviyyəli oyunçudur. Eyni soyunub-geyinmə otağını paylaşdığımızı və eyni səviyyədə çıxış etdiyimizi xatırlamaq mənim üçün xoşdur.
– Olduqca zəngin klub karyeran olub – Almaniyanın “Ayntraxt”, İngiltərənin “Vulverhempton”, həmçinin Portuqaliya, İsveçrə, Türkiyə və Polşa klublarında oynamısan. Klub səviyyəsində çıxışların baxımından ən yaddaqalan və uğurlu dövr hansı olub?
– Hər bir hekayənin eniş-yoxuşları var – bu, adi futbol həyatıdır. Hər ölkədə yeni bir şey əldə etmişəm: yeni mədəniyyət, taktiki biliklər, müxtəlif məşqçilərin təcrübəsi. Hansısa bir sevimli dövrüm yoxdur, amma İsveçrədə çox xoşuma gəlirdi – orada alman dilində sərbəst ünsiyyət qura bilirdim ki, bu da adaptasiyamı asanlaşdırırdı. Portuqaliyada da hər şey əla idi: naməlum ölkəyə gəldim və il yarım sonra portuqal dilində sərbəst danışırdım. Hər dövrün öz yaxşı və o qədər də yaxşı olmayan epizodları olub. Ümumiyyətlə, hər komandada əla təcrübə qazanmışam.
– 20 yaşında dünyanın ən güclü liqasına düşsən də, “Vulverhempton”un heyətində APL-də debüt etmək nəsib olmadı. İngiltərədə özünü daha yaxşı göstərmək şansın olubmu?
– Düzünü desəm, keçmişə baxıb belə şeylər haqqında düşünməyi sevmirəm. Mən orada idim, hər gün İngiltərə Premyer Liqası komandası ilə məşq edirdim və bu səviyyəni içəridən görürdüm. Müəyyən səbəblərdən icarə əsasında oynamalı oldum. Gənc futbolçu idim və oyun praktikasına ehtiyacım var idi. Amma APL-də keçirdiyim üç-dörd illik təcrübə özlüyündə heyrətamiz idi. Əlbəttə, rəsmi matçda oynamaq şansım olsaydı, imtina etməzdim. Lakin taleyin yazısı başqa cür oldu.
– Ukrayna Premyer Liqası, ümumiyyətlə, Ukrayna futbolu və ölkəmiz barədə nə bilirsən?
– Ukrayna futbolu haqqında çox şey bilirəm, çünki burada həmişə güclü klublar olub. Üstəlik, dostlarım Ukraynada oynayıblar, ona görə də çempionatı izləyir və matçlara baxırdım. Ölkənin özü haqqında da məlumatlı idim, baxmayaraq ki, əvvəllər yalnız sizin milliyə qarşı oynamışdım. Artıq burada yaşayacağam. İndi gördüklərim çox xoşuma gəlir – burada hər şey həqiqətən çox gözəldir. Ukraynada olmaqdan səmimi qəlbdən zövq alıram. Artıq şəhərlə az da olsa tanış olmağa imkan tapmışam və deyə bilərəm ki, Çernovtsini bəyəndim! Bura gözəl şəhərdir.
– “Bukovina”dakı məqsəd və iddiaların nələrdir? Klubumuzun azarkeşlərinə hansı mesajı çatdırmaq istərdin?
– İlk növbədə, burada olduğum üçün xoşbəxtəm. Əsas məqsədim komandaya kömək etməkdir, inanıram ki, komanda da mənə kömək edəcək. Mən hücumçuyam və mənim işim qol vurmaq, eləcə də tərəfdaşlarıma ötürmələr verməkdir. Azarkeşlərə isə bunu demək istəyirəm: sizin dəstəyiniz bizim üçün təsəvvür etdiyinizdən qat-qat artıq məna kəsb edir. Matçlarımıza gəlin, bizi evdə və səfərdə dəstəkləyin. Təcrübəmə güvənərək deyə bilərəm ki, tribunalar enerjisini ötürəndə, oyunçuları matçboyu dəstəkləyəndə komanda qat-qat çox qələbə qazanmağa qadirdir!