İsrailin aparıcı idman nəşrlərindən olan Walla Sport “Sabah”ın baş məşqçisi Valdas Dambrauskasın Bakıdakı davranışını və “Hapoel” (Beer-Şeva) ilə oyun öncəsi fikirlərini diqqətə çatdırıb.

Nəşr litvalı mütəxəssisi açıq, səmimi və gülərüz insan kimi xarakterizə edib. Bildirilir ki, Dambrauskas dünən keçirdiyi mətbuat konfransından sonra jurnalistlərin məşqi izləməsinə icazə verilən 15 dəqiqə ərzində meydana çıxaraq israilli həmkarları ilə uzun müddət söhbətləşib.

Walla Sport bunu məşqçilər arasında nadir davranış kimi qiymətləndirib. Nəşr qeyd edir ki, adətən rəqib ölkədən olan jurnalistlərlə belə səmimi ünsiyyətə vaxt ayırmaq çoxlarına xas deyil. Dambrauskas isə əksinə, israilli media nümayəndələri ilə təcrübəsini bölüşüb və onların suallarını böyük maraqla cavablandırıb.

Dambrauskas söhbət zamanı Litvada yəhudi irsi ilə bağlı mühüm tarixi məkanlardan da danışıb. O, jurnalistlərə ölkəsində yəhudilik tarixi ilə bağlı xüsusi əhəmiyyət daşıyan yerləri ziyarət etməyi tövsiyə edib.

Litvalı məşqçinin İsraillə bağlı şəxsi xatirələri də var. O, bu ölkəyə iki dəfə səfər etdiyini bildirib. İlk səfəri 2011-ci ildə Litvanın “Akers” komandası ilə “Hapoel”ə (Tel-Əviv) qarşı oyuna təsadüf edib. İkinci dəfə isə çalışdırdığı Litvanın gənclər komandası ilə İsrailə gəlib.

Dambrauskas hətta “Hapoel”in iki futbolçusunu – Eliel Perets və İqor Zlatanoviçi “Sabah”da görmək istədiyini də söyləyib.

“Sabah”ın baş məşqçisi “Hapoel”in baş məşqçisi Ran Kozaçın işinə də yüksək qiymət verib. O, Beer-Şeva klubunun həm əvvəlki mərhələlərdəki, həm də ötən həftə “Sabah”a qarşı keçirdiyi oyundakı çıxışını yaxından izlədiyini bildirib.

“Mən “Hapoel”i 2017-ci ildən, onların Çempionlar Liqasına vəsiqə uğrunda mübarizə apardıqları vaxtdan izləyirəm. Artıq doqquz ildir bu klubla maraqlanıram. Ötən həftə onlara qarşı oynadıq. Ümid edirəm ki, bu dəfə oyun fərqli olacaq. Onlar ötən həftə bizə qarşı çox təsirli futbol nümayiş etdirdilər. Öz səhvlərimizi minimuma endirməliyik”, – deyə Dambrauskas bildirib.

Walla Sportun yazısından belə nəticə çıxarmaq olar ki, “Sabah”ın litvalı baş məşqçisi təkcə taktiki hazırlığı ilə deyil, rəqib ölkənin mətbuatına və mədəniyyətinə münasibəti ilə də israilli jurnalistlərdə müsbət təəssürat yaradıb. Bakıdakı cavab qarşılaşması öncəsi isə onun əsas məqsədi daha aydındır: “Hapoel”in güclü tərəflərini neytrallaşdırmaq və ilk oyundakı nəticədən sonra mərhələni “Sabah”ın xeyrinə çevirmək.