Premyer Liqanın II turunda səfərdə “Zirə”yə 1:3 hesabı ilə uduzan “İmişli”nin baş məşqçisi Fərid Namazov matçdan sonra məğlubiyyətin səbəblərini açıqlayıb. Rəqibin təzyiqinə tab gətirməyə çalışdıqlarını, lakin buraxılan fərdi səhvlərin və ehtiyat skamyasındakı kadr çatışmazlığının nəticəyə təsir etdiyini bildirən mütəxəssis, gənc oyunçulardan istifadə etməyin yaratdığı risklərdən də danışıb.

Görüşün gedişatını şərh edən Namazov “Zirə”nin təzyiqinə qarşı müqavimət göstərməyə çalışdıqlarını bildirib: “Bilirdik ki, ‘Zirə’ matçda dominant olmağa çalışacaq. Biz də buna mane olmağa cəhd etdik. Topu rəqibə vermək istəmirdik, lakin bunun nə dərəcədə alındığı başqa sualdır. Matç zamanı məhz təhlil etdiyimiz epizodlardan qollar buraxdıq. Fərdi səhvlərə yol verdik, amma futboldur, bunlar olur”.

Komandadakı kadr çatışmazlığına və əvəzetmələrin məhdudluğuna toxunan baş məşqçi, gənc futbolçulardan istifadə etməyin müəyyən risklər daşıdığını vurğulayıb: “Ehtiyat oyunçular skamyamızla bağlı müəyyən problemlərimiz var. Təbii ki, gənc futbolçulara şans vermək klubun əsas strategiyalarından biridir. Lakin hesabda geridə olduğumuz matçda gənclərə şans vermək müəyyən risklər yaradır. Hesab edirəm ki, yaxın vaxtlarda bu məsələni də həllini tapacağıq və problemləri aradan qaldıracağıq”.