UEFA Konfrans Liqasının III təsnifat mərhələsinin cavab oyunları çərçivəsində üz-üzə gələcək “Qarabağ” və “Dinamo” (Kiyev) komandalarının oyunöncəsi mətbuat konfransı və açıq məşq saatları məlum olub.

Ağdam klubunun mətbuat xidmətindən verilən məlumata görə, avqustun 12-də hər iki komandanın tədbirləri baş tutacaq. Media nümayəndələri üçün nəzərdə tutulan proqrama əsasən, ilk olaraq “Qarabağ”ın baş məşqçisi Qurban Qurbanov saat 13:30-da “Azersun Arena”da mətbuat konfransı keçirəcək. Ağdam təmsilçisinin ilk 15 dəqiqəsi jurnalistlər üçün açıq olan məşqi isə eyni məkanda saat 18:45-də start götürəcək. Rəqib “Dinamo”ya gəldikdə, baş məşqçi İqor Kostyuk saat 17:00-da Tofiq Bəhramov adına Respublika stadionunda media önünə çıxacaq. Bundan yarım saat sonra, yəni 17:30-da isə Ukrayna klubunun eyni arenada ilk 15 dəqiqəsi mətbuat üçün açıq olan hazırlıq prosesi başlayacaq.

Xatırladaq ki, mərhələnin həlledici “Qarabağ” – “Dinamo” qarşılaşması avqustun 13-də, saat 20:00-da Tofiq Bəhramov adına Respublika stadionunda keçiriləcək.