Danimarkanın AGF (“Orxus”) klubu UEFA Çempionlar Liqasının III təsnifat mərhələsinin ilk matçında öz meydanında Azərbaycan çempionu “Sabah”ı qəbul edəcək. Oyundan öncə Danimarka mediası rəqibini — “Sabah” yaxından təhlil edən geniş material dərc edib.
Danimarkalılar “Sabah”ı UEFA xəritəsinin ən ucqar nöqtəsi kimi dəyərləndirirlər: “Çərşənbə günü Randersdə qarşılaşacağımız rəqib Danimarkadan 3300 km aralıda, Cənubi Qafqazda yerləşən Bakı təmsilçisidir. Bu, UEFA çərçivəsində coğrafi baxımdan ən uzaq səfərimiz olacaq. “Sabah” öz ev oyunlarını Masazır qəsəbəsində yerləşən 8900 nəfərlik “Bank Respublika Arena”da keçirir”.
Media “Sabah”ın bu mövsüm Avropadakı uğurlu çıxışına və daxili arenadakı çempionluğuna xüsusi diqqət çəkib: ” ‘Sabah’ Çempionlar Liqasının ilk iki mərhələsində ‘Nyu Seynts’ (ümumi hesab 4:1) və Finlyandiyanın ‘KuPS’ (3:0) klublarını inamla keçib. Azərbaycan Premyer Liqası avqustun 14-də başlayacağı üçün onlar bütün diqqətlərini avrokuboklara yönəldiblər. 2017-ci ildə yaradılan bu gənc klub ötən mövsüm illərdir hegemonluq edən ‘Qarabağ’ı geridə qoyaraq həm çempionluğu, həm də ölkə kubokunu (“qızıl dubl”) qazanıb.”
Danimarka mətbuatı “Sabah”ın çoxmillətli heyətə sahib olduğunu və son matçda əsas heyətdə yalnız iki yerli futbolçunun yer aldığını xüsusi vurğulayır. Danimarkalıların diqqət mərkəzində saxladığı əsas fiqurlar isə üç futbolçudur: komandada keçirdiyi dörd il ərzində 143 oyuna 74 qol vuraraq əsl “qol maşını”na çevrilən alman-ruandalı hücumçu Coy-Lans Mikels, bu yay heyətə cəlb olunan və vaxtilə “Holştayn Kil”də AGF-li Maqnus Knudsenlə komanda yoldaşı olmuş Polşa millisinin sol müdafiəçisi Timoteuş Puxaç və Kiyev “Dinamo”sundan yaxşı tanıdıqları Yamayka yığmasının sürətli hücumçusu Kahim Pərris. Danimarka mediası məhz bu üçlüyü Azərbaycan çempionunun avrokuboklardakı əsas təhlükə mənbəyi kimi dəyərləndirir.
Danimarkalılar “Sabah”ın baş məşqçisi Valdas Dambrauskasın taktiki dəst-xəttini də dəyərləndiriblər:
“Keçən yaydan komandanı çalışdıran litvalı mütəxəssis vaxtilə ‘Mançester Yunayted’, ‘Fulhem’ və ‘Brentford’un gənclər sistemində təcrübə toplayıb. Xorvatiya, Yunanıstan və Bolqarıstanda işləmiş Dambrauskas müdafiədə intizamlı, eyni zamanda topa nəzarət etməyi sevən komanda formalaşdırıb”. Xatırladaq ki, cütün ilk oyunu avqustun 5-də Randers şəhərindəki “Cepheus Park” stadionunda keçiriləcək. Cavab matçı isə avqustun 11-də Bakıda baş tutacaq.