Futbolda vəziyyət bəzən bir anın içində dəyişir. Hristo Yanevin rəhbərlik etdiyi ÇSKA üçün Bakıda “Qarabağ”la əldə edilən heç-heçə əsl xilas yolu oldu. Hələ matçdan əvvəl bolqarıstanlı mütəxəssisi kəskin tənqid edən və onu istefaya səsləyən yerli jurnalistlər belə, oyundan sonrakı mətbuat konfransı zalına daxil olan Yanevi gur alqışlarla qarşıladılar.
Bu mənzərə “Qarabağ”ın baş məşqçisi Qurban Qurbanovun da diqqətindən yayınmadı. Həmkarının alqışlanmasını şərh edən təcrübəli mütəxəssis Yanevin ünvanına xoş sözlər ünvanladı: “Xristo Yanev çox yaxşı məşqçidir və taktiki cəhətdən olduqca istedadlıdır. ÇSKA bu gün mükəmməl oyun nümayiş etdirdi, buna görə də baş məşqçinin alqışlanması tamamilə haqlıdır”.
Bununla belə, Qurban Qurbanov cavab oyununa daha yaxşı hazırlaşacaqlarını bildirdi: “Bir həftə sonra “Qarabağ” daha güclü olacaq və biz növbəti mərhələyə adlamaq üçün hər şeyimizi ortaya qoyacağıq”.
Bolqarıstan ictimaiyyətinin bütün diqqəti “Qarabağ”la cavab matçına yönəlsə də, daxili çempionatda “Botev”ə qarşı keçiriləcək görüş 31 qat çempionun həm mövsümdəki taleyi, həm də təmsilçimizlə dueli üçün həlledici xarakter daşıyır. 19 illik həsrətdən sonra çempionluq titulunu qaytarmaq ÇSKA-nın əsas hədəfidir. Daxili birincilikdə “Botev” üzərində qazanılacaq inamlı qələbə, “Qarabağ”la həlledici cavab qarşılaşması öncəsi komandada böyük ruh yüksəkliyi yaradacaq.
Son illər qeyri-sabit çıxışı ilə yadda qalan ÇSKA indi tarixi bir fürsətin astanasındadır. “Botev” səddini keçmək və tam dolu “Vasil Levski” stadionunda “Qarabağ”ı mübarizədən kənarlaşdırmaq Hristo Yanevin postunda tam möhkəmlənməsi demək olacaq. Bolqarlar inanırlar ki, Bakıdakı nəticə onların yeni yüksəlişinin yalnız başlanğıcıdır. Biz isə əksinə, əminik ki, “Köhlən atlılar” iki il əvvəl “Ludoqorets”lə qarşılaşmada olduğu kimi, eyni senarini bir daha təkrarlamağa qadirdir. O zaman evdəki 1:2 hesablı yenilgidən sonra Bolqarıstanda rəqibini darmadağın edərək (7:2) mərhələ adlayan təmsilçimiz bu dəfə də azarkeşlərinə böyük sevinç bəxş edəcək. Bir sözlə, sonda sevinən tərəf yenə biz olacağıq!