“Turan-Tovuz” haqqında UEFA-nın çoxdan məlum olan hökmü axır ki, birdəfəlik səsləndi. “Turan-Tovuz” Avropa klub yarışlarına buraxılmayacaq. Onun əvəzinə Konfrans Liqasında “Zirə” çıxış edəcək. Bu da taleyin başqa bir oyunudur. Vaxtilə “Turan-Tovuz”un rəhbəri Ehtiram Quliyevin emosiyalarını cilovlaya bilməyərək dini məzhəb mənsubiyyətinə eyham vuranda heç ağlına da gəlməzdi ki, çərxi-fələk ona belə bir sürpriz hazırlayıb. Günahkar isə nə “oturaraq su içənlərdir”, nə də çərxi-fələk. Ehtiram Quliyev mövsümün əvvəlində qollarını çırmalayaraq həvəslə Tovuz klubunun şturvalının arxasına keçəndə və pullarını sağa-sola xərcləyəndə heç ağlına da gəlməzdi ki, “həyatının missiyası” üçün qoyduğu sərmayə və çəkdiyi əziyyət elə “İmişli”, “Karvan”, “Şamaxı” ilə ölkə daxilində yarışmaq üçündür. Ehtiram müəllimin düşdüyü duruma baxanda Mirzə Fətəli Axundovun “Aldanmış Kəvakib” hekayəsi yadıma düşür. Və “Tovuzlu Kəvakib”i aldadan da elə Yusif Sərrac kimi öz ətrafı oldu. Daha doğrusu, Ehtiram Quliyev yaratdığı hay-küy emosiyaları ciddi və peşəkar işi unudub özlərini daha çox azarkeş kimi aparırdılar. Yaranmış vəziyyətin tək məsuliyyəti klub nümayəndələri, xüsusən də hüquqi, prosedura məsələlərinə cavabdeh olanlardır ki, təhvil-təslim zamanı səriştəsizlik nümayiş etdirmişlər. Psixologiya elmi təsdiq edir ki, uğursuzluğa görə özündən başqa hər kəsi qınayan şəxs zəif insandır. Ehtiram Quliyev işində kifayət qədər uğur qazanmış insandır və “Turan-Tovuz”u bu qədər fasilədən sonra yenidən Avropaya daşıması da onun bacarıqlı olmasından xəbər verir. Elə bu səbəbdəndir ki, bəzi azarkeş və media mənsubu kimi günahkar ovuna çıxmır. Gəmidə fəsad varsa kapitan günahkardır. Təəssüf doğuran tək məsələ isə Tovuz azarkeşlərinin bu gedişata layiq olmamasıdır. Tovuz Azərbaycanın 2-3 futbol beşiyindən biridir və bu bölgə əsl futbol bayramına layiq idi. Təəssüflər olsun ki, səriştəsiz iş Ehtiram Quliyevi və Tovuz azarkeşlərini bayramdan elədi. Əgər məsələ klubun təhvil-təslimi zamanı bilinsə idi, o zamandan hüquqi proseslər başlasaydı, bəlkə də “Turan” bu gün püşkatmanı gözləyirdi. Xoşbəxtlikdən Quliyevi Yusif Sərracın taleyi gözləmir. Başqan özündə güc tapıb yeni mövsümə hazırlaşa bilər. Hərgah ətrafına yığdığı klub rəsmiləri ona yeni sürprizlər hazırlamayıblarsa.
