Şimali Amerikada start götürən DÇ-də böyük bir sürprizlə yaşanıb. Turnirin əsas favoritlərindən sayılan Avropa çempionu İspaniya, mundialın debütantı Kabo-Verde məğlub edə bilməyib (0:0). Matçın qəhrəmanı isə Portuqaliyanın ikinci liqasında çıxış edən və rəqibin bütün hücumlarının qarşısını alan 40 yaşlı qapıçı Vozinya olub.
Qocaman qapıçının bu emosional anları dünyanın aparıcı idman mediası və sosial şəbəkələrində böyük rezonans doğurub. Nüfuzlu “talkSPORT” nəşri Vozinyanın dünya çempionatındakı bu tarixi debütdə matçın ən yaxşı oyunçusu seçilməsini və final fitindən sonra göz yaşlarını gizlədə bilməməsini xüsusi işıqlandırıb. X platformasının yüz minlərlə izləyicisi olan “Out of Context Football Manager” səhifəsi isə təcrübəli qolkiperin qapısını toxunulmaz saxladıqdan sonra ağlamasına toxunaraq, “Əla, indi hamımız ağlayırıq…” şərhi ilə futbol ictimaiyyətini duyğulandırıb. Ciddi təhlillərlə yanaşı, idman mətbuatında bu tarixi uğurla bağlı maraqlı yumora da yer verilib. Zarafatla qeyd ediblər ki, göstərdiyi bu qəhrəmanlıqdan sonra 40 yaşlı qapıçıya doğma vətənində bir daha heç vaxt içki üçün pul ödəmək lazım gəlməyəcək.
Matçın ardından aparıcı statistika portalları və idman analitiklərinin təqdim etdiyi unikal göstəricilər də qeydə alınan nəticənin nə dərəcədə tarixi bir hadisə olduğunu sübut edir. Dünyaca məşhur “Sofascore” portalı Vozinyanın meydandakı möhtəşəm performansını 9.7 kimi olduqca yüksək balla qiymətləndirib ki, bu da 1966-cı ildən bəri dünya çempionatlarında iştirak edən 40 və daha yuxarı yaşlı futbolçular arasında qeydə alınan ən yüksək reytinqdir. “The Touchmine” nəşri isə təcrübəli qapıçının nağıla bənzər karyerasına işıq tutaraq xatırladıb ki, Vozinya peşəkar futbola çox gec – yalnız 25 yaşında Anqolada başlayıb. Uzun illər həvəskar səviyyədə oynadıqdan sonra 40 yaşında İspaniya kimi bir dünya nəhənginə qarşı belə bir şou göstərməsi sonsuz əzmkarlığın ən bariz nümunəsidir.
Digər unikal bir rekordu isə “TruMedia Sports”un analitiki Pol Karr diqqətə çatdırıb. Onun rəsmi məlumatına görə, Kabo Verde millisi matç boyu rəqibin hücum zonasında cəmi 26 dəfə topa toxunaraq, 1966-cı ildən bəri mundiallar tarixinin ən aşağı göstəricisini qeydə alıb. Hücumda demək olar ki, varlıq göstərə bilməyən komandanın qapısını təkbaşına qoruyan Vozinya isə oyun ərzində düz 68 dəfə topa toxunub. Bununla da qocaman qolkiper, 1998-ci il dünya çempionatında xorvatiyalı Drajen Ladiçin göstərdiyi bənzər nəticədən sonra, mundiallar tarixində əsas vaxtda topa ən çox toxunan qapıçı kimi adını futbol tarixinə qızıl hərflərlə yazdırıb.