“Neftçi”nin baş məşqçisi Yuri Vernidub Azərbaycan Premyer Liqasının 33-cü turunda “Kəpəz” üzərində qazanılan minimal hesablı (1:0) qələbədən sonra mətbuat konfransında iştirak edib.

Ukraynalı mütəxəssis matçla bağlı təəssüratlarını bölüşməklə yanaşı, gələcək karyerası və komandadakı vəziyyətlə bağlı maraqlı açıqlamalar verib.

Avrokuboklara hazırlıq dövrünün qısa olması ilə bağlı narahatlıqlara toxunan Vernidub, bunun yalnız “Neftçi”yə deyil, bütün klublara aid bir çətinlik olduğunu bildirib: “Bu, ümumi problemdir. Lakin biz mövcud vəziyyətdən ən yaxşı şəkildə çıxmaq üçün əlimizdən gələni edəcəyik. Mən istənilən ssenariyə hazıram”.

Azarkeşlərin ona olan böyük rəğbəti və uzunmüddətli müqavilə arzularına münasibət bildirən baş məşqçi, hazırda işinə fokuslandığını vurğulayıb: “Müqaviləmin bitməsinə hələ bir il var və bu müddət ərzində maksimum nəticə göstərməyə çalışacağam. Məşqçilik peşəsi olduqca qeyri-sabitdir. Bu gün zirvədəsən, sabah isə hər şey əksinə ola bilər. Əgər rəhbərlikdən uzunmüddətli təklif gələrsə, əlbəttə ki, dəyərləndirərəm. Mən Azərbaycanı və buranın insanlarını çox sevirəm, burada işləməkdən məmnunam”.

Karyerasının böyük hissəsini Ukraynada keçirməsinin səbəblərinə də toxunan mütəxəssis, “Neftçi”dəki şəraitdən razılığını ifadə edib: “Ukraynada bütün mərhələləri – akademiyadan tutmuş əsas komandaya qədər keçmişəm. Belorusiyadakı fəaliyyətimdən sonra vətənə dönüb “Krivbass”la bürünc medal qazanmaq böyük uğur idi. Yeni təklifləri həmişə nəzərdən keçirirəm. Ancaq vurğulamaq istəyirəm ki, “Neftçi” kimi böyük bir kluba gəlmişəm. Burada yüksək səviyyəli şərait var və bizə sadəcə, işləyib nəticə qazanmaq qalır”.