Norveçdə futbol artıq sadəcə bir oyun deyil, milli qürur mənbəyidir. Ölkənin mundiala hazırlığı o qədər yüksək səviyyədədir ki, milli komandanın heyətini baş məşqçi Stale Solbakken yox, birbaşa Norveç Kralı V Harald şəxsən təqdim edib.

Kralın milli telekanallarda yayımlanan və xalqa müraciət formatında hazırlanan video-mesajı böyük maraqla qarşılanıb. V Harald çıxışı zamanı heyətin bütün ölkəni təmsil etdiyini vurğulayıb: “Dünya Çempionatında iştirak etmək – uzunmüddətli əməyin və xalqımızın cəsarətli xəyallara olan inamının nəticəsidir. Futbol bizim üçün həm böyük şəhərlərdə, həm də kiçik yaşayış məntəqələrində çox şey ifadə edir. İndi isə dünyanın zirvəsini fəth etmək üçün ən yaxşılarımızı yola salırıq”.

Video-müraciətdən dərhal sonra rəsmi təqdimat mərasimi maraqlı bir məkanda – Stale Solbakkenin doğulub boya-başa çatdığı və futbol karyerasına başladığı, cəmi 1200 nəfər əhalisi olan Kirkenaer kəndində keçirilib. Tədbir 7-ci divizion təmsilçisi “Qryu İL” klubunun stadionunda təşkil olunub.

1991-ci ildən taxtda oturan və xalq arasında “İdman Kralı” kimi tanınan 89 yaşlı V Haraldın idmana olan bağlılığı hər kəsə bəllidir. Hələ vəliəhd olduğu dövrdə o, yelkənli idman növü üzrə üç Olimpiadada – Tokio-1964, Mexiko-1968 və Münhen-1972-də ölkəsini təmsil edib. Hətta 1964-cü il Tokio Oyunlarında Norveç yığmasının bayraqdarı da məhz o olub.

Məğrur monarx öz idman karyerasını olduqca gec – 2022-ci ilin iyulunda, 85 yaşında ikən başa vurub. O, Cenevrədə keçirilən klassik yaxtalar üzrə Dünya Çempionatında 10-cu yeri tutaraq, uzun illər davam edən peşəkar karyerasına uğurlu bir nöqtə qoymuşdu.