Premyer Liqasda qalibi “Sabah”, cari çempionatın son ev oyununda azarkeşləri üçün unudulmaz proqram hazırlayıb.
Paytaxt təmsilçisi 32-ci tur çərçivəsində “Neftçi”yə qarşı keçiriləcək derbi öncəsi fanatlarına unikal şans və bol əyləncə vəd edir. Klubun “Bank Respublika” və “Azərlotereya” ilə ortaq layihəsi sayəsində, stadiona gələn azarkeşlərdən ikisi “bayquşlar”ın Çempionlar Liqasının təsnifat mərhələsindəki ilk səfər oyununa yollanmaq şansı qazanacaq. Səfər xərcləri tamamilə tərəfdaşlar tərəfindən qarşılanacaq.
Mövsümün son ev matçı təkcə futbolla yekunlaşmayacaq. Oyunun startından 2 saat əvvəl azarkeşlər üçün müxtəlif hədiyyəli müsabiqələrlə zəngin fan-zona fəaliyyət göstərəcək. Böyük derbinin final fiti çalındıqdan sonra isə arenada əsl bayram ab-havası yaşanacaq. İlk olaraq tanınmış “Qara Dərviş” qrupunun iştirakı ilə möhtəşəm şou-proqram baş tutacaq, ardınca isə “Sabah”ın 2025/26 mövsümünün çempionluq kuboku və qızıl medalları ilə təltifetmə mərasimi təşkil olunacaq.
Qeyd edək ki, “Bank Respublika Arena”da keçiriləcək bu tarixi qarşılaşmanın bilet satışı hazırda sürətlə davam edir.