Fransa futbolunun nəhənglərindən olan “Lion” yenidən Avropanın elit turnirinə – Çempionlar Liqasına qayıtmağa çox yaxındır. Lakin komanda meydanda vəsiqəni təmin etsə belə, UEFA-nın sərt qərarları səbəbindən turnirdən kənarda qala bilər. Liqa 1-in son turu ərəfəsində “Lion” 60 xalla 4-cü pillədə qərarlaşıb. Onlar “Renn”i bir xal qabaqlayır, “Lill”dən isə cəmi bir xal geri qalırlar. PSJ-nin çempionluğu, “Lans”ın isə gümüş medalları təmin etdiyi mövsümdə “Lion” üçün hər xal həlledicidir.

Turnir cədvəlinin 3-cüsü ÇL-in qrup mərhələsinə, 4-cü pillənin sahibi isə təsnifat mərhələsinə vəsiqə qazanacaq. 5-ci yer isə komandaya Avropa Liqasında iştirak hüququ verir.

The Telegraph nəşrinin məlumatına görə, “Lion” nəinki ÇL-dən, ümumiyyətlə Avropa kuboklarından kənarlaşdırılma təhlükəsi ilə üz-üzədir. Bunun səbəbi klubun UEFA ilə əldə olunmuş maliyyə sabitliyi sazişinin şərtlərini yerinə yetirməməsidir.

Ötən yay UEFA “Lion”la yanaşı, “Çelsi” və “Aston Villa” kimi klublara maliyyə qaydalarını pozduqları üçün sanksiyalar tətbiq etmişdi. “Lion” üçün əsas tələb ondan ibarət idi ki, klub rəhbərliyi 2025-ci il iyulun 15-dək 60 milyon avro ödəməli və həmin məbləği oktyabrın 15-nə qədər nizamnamə kapitalına çevirməli idi. Mövcud məlumatlara görə, klub bu öhdəliyi yerinə yetirməyib.

Klubun vəziyyəti təkcə UEFA sanksiyaları ilə deyil, həm də daxili maliyyə çöküşü ilə ağırlaşır. Yalnız ötən ilin ikinci yarısında klubun zərəri 186 milyon avro təşkil edib. Hazırda klub Mikel Kanq və “Ares Management” tərəfindən idarə olunur. Onlar rəhbərliyi Con Tekstorun uğursuz idarəçiliyindən sonra təhvil alıblar.

“Lion” rəhbərliyi hazırda UEFA-nı cəzaları yumşaltmağa inandırmaq üçün genişmiqyaslı qənaət proqramı həyata keçirir. Klub maliyyə balansını düzəltmək üçün ən dəyərli oyunçularını satmağa da hazırdır. İndi “Lion” azarkeşlərini bir sual düşündürür: Komanda meydanda qazandığı uğuru kabinetlərdə qoruya biləcəkmi?