Premyer Liqanın XXVIII turu çərçivəsində keçirilən “Sumqayıt” – “Qəbələ” qarşılaşması meydan sahiblərinin minimal hesablı qələbəsi (1:0) ilə başa çatıb. Oyundan sonra keçirilən mətbuat konfransında “gənclik şəhəri” təmsilçisinin baş məşqçisi Saşa İliç komandasının çıxışını qiymətləndirib.

Uzunmüddətli uğursuz seriyaya son qoyan İliç, nəticədən razı qalsa da, sərgilənən futboldan narazılığını gizlətməyib: “Düzünü desəm, komandamın oyunundan narazı qaldım. Lakin uzun fasilədən sonra yenidən qələbə qazanmaq bizim üçün olduqca müsbət haldır”.

Baş məşqçi 9 matçlıq qələbə həsrətinə son qoymağın psixoloji üstünlüklərinə də toxunub. O bildirib ki, bu üç xal komandada motivasiyanı bərpa etmək üçün həlledici rol oynaya bilər: “9 oyundan sonra qazanılan qələbə komandadakı ab-havanı düzəltmək baxımından çox vacibdir. Bu qələbə qarşıdakı oyunlar üçün stimul olsa da, oyun keyfiyyətinin yüksəldilməsi mütləqdir”.

Matç zamanı komandanın aparıcı üzvlərindən olan Nikola Ninkoviçin erkən əvəzlənməsinə də aydınlıq gətirən mütəxəssis, bunun sırf taktiki və performansla bağlı olduğunu vurğulayıb: “Ninkoviç bizim üçün hər zaman vacib oyunçudur. Lakin bu gün onun nümayiş etdirdiyi performans məni qane etmədi. Bu səbəbdən də oyuna müdaxilə edərək onu əvəzləmək qərarına gəldim”.