Azərbaycanın gənclərdən ibarət milli komandasının (U-20) baş məşqçisi Rui Jorje məşqçilər heyətini yerli mütəxəssislərlə gücləndirməyə davam edir. Portuqaliyalı mütəxəssisin korpusunda yer alacaq növbəti köməkçinin adı məlum olub.

Verilən məlumata görə, millidə qapıçılarla iş üzrə məşqçi funksiyasını Üzeyir İbrahimov yerinə yetirəcək. Təcrübəli mütəxəssis bu sahədə kifayət qədər zəngin karyeraya malikdir. O, daha əvvəl ölkənin köklü klublarından olan “Neftçi” və “İnter” (hazırkı “Şamaxı”) komandalarında çalışıb.

İbrahimovun milli komanda təcrübəsi də az deyil, o, müxtəlif illərdə ölkəmizin U-17, U-19 və U-21 yığmalarında qapıçıların hazırlığına cavabdehlik daşıyıb.

Xatırladaq ki, Rui Jorjenin yerli köməkçilərindən biri də Azərbaycan futbolunun tanınmış simalarından olan Vaqif Cavadovdur. Beləliklə, portuqaliyalı baş məşqçinin qərargahı həm gənc, həm də təcrübəli yerli kadrlardan ibarət heyətlə yeni tsikl hazırlıqlarını davam etdirəcək.