UEFA Konfrans Liqasının II təsnifat mərhələsinin ilk matçında Bakıda Belarusun “Dinamo” (Minsk) klubuna 2:4 hesabı ilə məğlub olan “Neftçi”nin baş məşqçisi Yuri Vernıdub oyundan sonra keçirilən mətbuat konfransında mətbuat mənsublarının suallarını cavablandırıb.

Təcrübəli mütəxəssis qarşılaşmadakı gözlənilməz geriləmənin səbəblərini açıqlayıb, qapıçı Emil Balayevin zədələnməsinə toxunub və istefa barədə səslənən iddialara kəskin cavab verib.

Mətbuat konfransına jurnalistləri Milli Mətbuat Günü münasibətilə təbrik edərək başlayan ukraynalı baş məşqçi, oyunun ilk dəqiqələrindəki üstünlüyün necə əldən çıxdığını belə şərh edib: “Tam üstünlük qazanıb ilk 15-20 dəqiqədə iki qol vuranda oyunun xarakteri dəyişir. Ötürmələrdə səhvlərə yol verdik, rəqibə hücum etmək imkanı yaratdıq. Qırılma nöqtəsi təxminən 20-ci dəqiqədə Emil Balayevin çətin seyvindən sonra zədələnməsi oldu. O, oyunu davam etdirməyə çalışsa da, əvəzlənmək məcburiyyətində qaldı. Böyük ehtimalla, ilk qolu buraxmağımızda bu zədənin rolu oldu”.

Fasiləyə 2:1 hesabı ilə öndə yollandıqlarını xatırladan Vernıdub, ikinci hissədə buraxılan qolların sırf fərdi səhvlərdən qaynaqlandığını vurğulayıb: “İkinci hissədə buraxdığımız qollar öz səhvlərimizin nəticəsi idi. Buna baxmayaraq, daha sonra Emil Səfərov və Rüfət Abbasovla azı 2-3 real qol epizodu yaratdıq. Oturub matçı təhlil edəcəyik. Ayrı-ayrı futbolçuları günahlandırmaq istəmirəm, baş məşqçi kimi bütün məsuliyyət mənim üzərimdədir”.

Avrokuboklarla erkən vidalaşacağı təqdirdə komandadan ayrılıb-ayrılmayacağı ilə bağlı suala Vernıdub özünəəmin cavab verib: “Sizcə, iki uduzulmuş oyundan sonra geriyə dönüb getməliyəm? Mən başqa cür düşünürəm. ‘Neftçi’ böyük tarixi olan klubdur. Bu idmandır, ilk məğlubiyyətdən sonra ‘istefa verəcəksiniz?’ sualının verildiyini hələ eşitməmişəm. ‘Dinamo’ da ilk matçda ‘Sileks’ə uduzub, sonra mərhələni keçdi. Məşqçiyə işləmək üçün şərait yaratmaq lazımdır. Biz cavab oyununa hazırlaşacağıq və orada revanş almaq gücündüyük”.

Mütəxəssis Klisman və Emin Mahmudovlu yarımmüdafiə xəttinin 20-ci dəqiqədən sonra istənilən presinqi edə bilməməsi ilə bağlı sualı soyuqqanlılıqla qarşılayıb: “Razıyam ki, 20-ci dəqiqədən sonra istədiyimiz presinqi tətbiq edə bilmədik. Amma indi emosiyalarla danışmaq doğru olmaz. Yatıb dincəlməli, ayıq başla matçı izləyib səhvlərimizi analiz etməliyik”.

Təcrübəli mütəxəssis azarkeşləri təmkinli olmağa çağırıb: “Bu futboldur, belə hallar olur. Mənə həmişə qazanan bir komanda göstərin. Sizin işinizdə də səhvlər olur, amma heç kim sizi dərhal işdən qovmur. Əsas odur ki, səhvlərdən düzgün nəticə çıxarıb irəli gedək”.