Azərbaycan Kubokunun finalında “Zirə”ni 2:1 hesabı ilə məğlub edərək titula sahib çıxan “Sabah”ın baş məşqçisi Valdas Dambrauskas qarşılaşmadan sonra mətbuat konfransında qələbə təəssüratlarını bölüşüb.

Litvalı mütəxəssis ilk növbədə komandasını və klub personalını təbrik edib: “İlk növbədə futbolçularımı təbrik edirəm. Onları təkcə bugünkü oyuna görə deyil, bütün mövsüm boyu nümayiş etdirdikləri mübarizəyə görə alqışlayıram. Onlar əsl qəhrəmandırlar. Demək olar ki, ideal mövsüm keçirdik – iki titul qazandıq, 33 oyunluq məğlubiyyətsizlik seriyası yaxaladıq və çempionatın bitməsinə bir ay qalmış qızıl medalları təmin etdik. Bütün bunlar oyunçuların meydandakı fədakarlığının nəticəsidir. Onlar qalib gəlməyi nə qədər çox istədiklərini sübut etdilər”.

Dambrauskas qələbədə payı olan hər kəsə, xüsusən də klub rəhbərliyinə təşəkkürünü bildirib: “Məşqçilər heyətinə, həkimlərə, texniki personala və klub rəhbərliyinə minnətdaram. Ramin Həsənov hər zaman yanımızda oldu, bizə böyük dəstək verdi. “Sabah” mənim karyeramda çalışdığım 10-cu klubdur. Buradakı ab-hava və insanların peşəkarlığı valehedicidir”.

Rəqibin oyununa da toxunan baş məşqçi bunları deyib: “Zirə”ni təbrik edirəm, çox yaxşı komandadırlar və məşqçi işi hiss olunur. Hesabı açdıqdan sonra müdafiəyə çəkilsələr də, mən bu oyundan zövq aldım. Sonda isə qalib tərəf biz olduq. Həmçinin, Azərbaycan futbolunu işıqlandıran, hər zaman press-konfranslarda iştirak edən jurnalistlərə də zəhmətlərinə görə təşəkkür edirəm”.

Dambrauskas finalda vurulan qollar arasındakı seçim barədə sualı belə cavablandırıb:

“Çox yaxşı sualdır. Biz hər zaman azarkeşlərin zövq alacağı hücum futbolu oynamağa çalışırıq. Seçim etməli olsam, deyərdim ki, hər iki qol bizim üçün həyati əhəmiyyət kəsb edirdi. Bu qolların arxasında böyük komanda işi dayanır. Məsələn, Mikels mövsümü möhtəşəm keçirdi, lakin o olmayanda Kahim Parris və Xəyal Əliyev onu layiqincə əvəzlədilər və vacib qollar vurdular. Futbolçularımla qürur duyuram, mən dünyanın ən xoşbəxt insanıyam”.

Karyerası ərzində 5 müxtəlif ölkədə titullar qazanan məşqçi “Sabah”dakı uğurunu digərləri ilə müqayisə etmək istəməyib:

“Heç bir klubu müqayisə etmək istəməzdim, çünki hər birinin mənim üçün öz yeri var. “Hayduk”la qazandığım kubok çox emosional idi. Lakin Azərbaycanda bir mövsümdə iki titul qazanmaq – həm çempionluq, həm kubok – bu, tamamilə fərqli və xüsusi bir hissdir. İnanıram ki, gələcəkdə azarkeşlərimizi daha böyük uğurlarla sevindirəcəyik”.