Mövsümün əvvəlində “Trabzonspor”dan rekord məbləğlə “Qalatasaray”a transfer olunan Uğurcan Çakır, son həftələrdə nümayiş etdirdiyi möhtəşəm oyunla diqqət mərkəzindədir. “Sarı-qırmızılı” formanı geyindiyi gündən etibarən artan tempini qoruyan milli qolkiper, komandanın əldə etdiyi uğurlarda əsas pay sahiblərindən birinə çevrilib.

Cari mövsümdə Superliqada 23 matça çıxan təcrübəli qapıçı rəqiblərinə keçid verməməkdə israrlıdır: O, bu qarşılaşmalarda qapısında cəmi 15 qol görüb, 10 oyunda isə çərçivəni toxunulmaz saxlayıb.

Uğurcanın yüksək forması barədə “Akşam” qəzetinə danışan atası Mustafa Çakır, oğlunun bu performansının ailəsi üçün sürpriz olmadığını deyib. O, uğurun əsas açarının “inam” olduğunu vurğulayaraq bunları söyləyib: “Biz Uğurcanın çıxışından qürur duyuruq. O, sadəcə öz işini görür. “Trabzonspor“da da eyni əzmlə mübarizə aparırdı, indi də hər şey qaydasındadır. Biz belə bir oyun gözləyirdik. Hesab edirəm ki, Uğurcan özünə inam və etimad hiss etdiyi hər yerdə uğur qazanacaq. Bu hiss onun üçün həlledicidir. İnşallah, qarşıdakı çətin oyunlarda daha böyük uğurlara imza atacaq”.“Qalatasaray”ın müdafiə xəttinə böyük inam verən Uğurcan Çakır, rekord transfer məbləğinin haqqını artıqlaması ilə ödəməkdə davam edir. Xüsusilə son üç qarşılaşmada qapısını “kilidləməsi”, çempionluq yolunda “Cim-Bom” üçün həyati əhəmiyyət kəsb edir.