FIFA prezidenti Canni İnfantino futbol üzrə dünya çempionatının səhmlərinin özəl investorlara satılması ilə bağlı təklifinə görə ciddi hüquqi problemlə üzləşə bilər.
“Sky Sports”un məlumatına görə, UEFA İsveçrədə İnfantino və onun ətrafındakı bəzi şəxslərə qarşı cinayət işi qaldırmağa hazırlaşır.
Məlumata əsasən, Avropa Futbol Assosiasiyaları İttifaqı (UEFA) ABŞ-da İnfantinonun dünya çempionatının səhmlərini özəl investorlara satmaq planının detallarını əks etdirən hüquqi sənədləri əldə etməyə çalışıb.
FIFA rəhbəri bu planı açıqladıqdan sonra ciddi tənqidlərlə üzləşib və təklifi geri götürüb. UEFA isə İnfantinonu və ətrafındakı şəxsləri FIFA-nın ən dəyərli aktivi hesab olunan dünya çempionatından uzunmüddətli maliyyə marağı əldə etməyə cəhd göstərməkdə ittiham edir. UEFA-nın əldə etdiyi sənədlərdə bildirilir ki, sözügedən planlar FIFA-ya, onun üzv assosiasiyalarına və futbol qurumları arasındakı münasibətlərə zərər vura bilərdi.
“Sky Sports”un UEFA-nın mövqeyinə istinadən yaydığı məlumata görə, qurum İsveçrədə İnfantino və mümkün olaraq digər FIFA rəsmiləri və məsləhətçiləri barədə cinayət xarakterli ittihamların irəli sürülməsi üçün hazırlıq görür. Beləliklə, dünya futbolunun ali qurumunda maliyyə məsələləri ətrafında yaranan mübahisə artıq hüquqi müstəviyə keçmək üzrədir.