UEFA Beynəlxalq Futbol Assosiasiyaları Şurasının (IFAB) təsdiqlədiyi və FİFA-nın dəstəklədiyi yeni qaydaların tətbiqindən imtina edib. İyunun 1-dən qüvvəyə minəcək dəyişikliklərə əsasən, oyunçular iki xüsusi halda – rəqiblə mübahisə zamanı ağzını örtmək və hakimin qərarına etiraz əlaməti olaraq meydanı tərk etmək – birbaşa qırmızı vərəqə ilə cəzalandırılmalı idi. Lakin UEFA bu qaydaların öz bayrağı altında keçirilən turnirlərdə, o cümlədən Çempionlar Liqasında tətbiq olunmayacağını bəyan edib.

FİFA-nın bu sərt tədbirləri tətbiq etməsinə cari ildə baş vermiş iki qalmaqallı hadisə səbəb olub. Bunlardan birincisi ÇL matçında “Real”in futbolçusu Vinisius Juniorun “Benfika”lı Canluka Prestiannini irqçilikdə ittiham etdiyi epizoddur. Həmin vaxt Prestianninin sözlərini gizlətmək üçün ağzını forması ilə örtməsi böyük müzakirələrə yol açmış və nəticədə futbolçu 6 oyunluq (3-ü şərti olmaqla) cəzalandırılmışdı.

İkinci insident isə Afrika Millətlər Kubokunun finalında qeydə alınıb. Seneqal millisinin oyunçuları rəqibin xeyrinə verilmiş penalti qərarına etiraz olaraq meydanı 15 dəqiqə tərk etmişdilər. Seneqal əlavə vaxtda 1:0 hesabı ilə qələbə qazansa da, Afrika Futbol Konfederasiyası (CAF) sonradan maraqlı qərar qəbul edərək, Mərakeşə 3:0 hesablı texniki qələbə vermişdi.

UEFA hazırda bu qaydaları tətbiq etməkdə tələsmir. Qurum yeni qaydaların futbola təsirini mundialda müşahidə etdikdən sonra gələcək addımları nəzərdən keçirməyi planlaşdırır. Milli çempionatlar, bu dəyişiklikləri tətbiq etməkdə sərbəstdir. İngiltərə Premyer Liqasının bu məsələ ilə bağlı mövqeyi isə klubların ümumi yığıncağından sonra bəlli olacaq.