Şimali Makedoniyanın paytaxtı Skopyedə start götürən U-20 Avropa çempionatının ilk günü yunan-Roma güləşçilərimiz üçün uğurlu keçib. Yarışın ilkin mərhələsində 55, 63, 77, 87 və 130 kq çəki dərəcələrində mübarizə aparan pəhləvanlarımızdan 3-ü adını finala yazdırıb, 1-i isə bürünc medal şansı qazanıb.

Milli komandamızın üzvlərindən xalçaya ilk olaraq Emin Cavadlı (55 kq) çıxıb. Rəqiblərinə aman verməyən gənc pəhləvanımız müvafiq olaraq Denizhan Ogün (Türkiyə, 5:1), Lenni Voerner (Almaniya, 16:5) və Vasileyos Papageorgiunu (Yunanıstan, 9:0) məğlub edərək adını həlledici mərhələyə yazdırıb. O, qızıl medal uğrunda ermənistanlı Edqar Petrosyanla gücünü sınayacaq. Digər finalçımız Cavidan Nehmətov (77 kq) isə Luka Kayanne (Finlandiya, 2:0), Nazar Berkovski (Rusiya, 8:0) və Alkan Akaranı (Türkiyə, 3:1) sıradan çıxararaq eyni uğuru təkrarlayıb. Cavidanın çempionluq yolundakı son rəqibi Ermənistan təmsilçisi Samvel Terteryan olacaq.

Yarışa inamlı start verən Orxan Hacıyev (87 kq) də komanda yoldaşlarından geri qalmayıb. Anton Buxholts (Almaniya, 9:0), Vladislav Solodçuk (Ukrayna, 11:9) və İtjak Nemsadzeni (İsrail, 9:0) mübarizədən kənarlaşdıran qəhrəmanımız finala yüksəlib və sabah rusiyalı Mixail Şkarinlə baş mükafat uğrunda qarşılaşacaq. Mübarizəyə 1/4 finaldan qoşulan ağırçəkili güləşçimiz Museyi-Kazım Hüseyn (130 kq) isə ilk görüşündə Lyova Şuxyanı (Ermənistan, 2:1) üstələsə də, yarımfinalda ukraynalı İvan Yankovskiyə (0:9) uduzub. Bununla belə, çıxışını davam etdirən təmsilçimiz sabah bürünc medal uğrunda türkiyəli Üzeyir Bostanla üz-üzə gələcək.

Tural Əhmədov (63 kq) isə 1/8 finalda gürcüstanlı Giorgi Tçikaidzeyə (0:9) məğlub olaraq çıxışını erkən başa vurub.