İngiltərə yığmasının kapitanı Harri Keyn DÇ-2026-nın 1/4 finalında Norveçlə oyundan (2:1) sonra komanda daxilində ziddiyyət yaratmağa çalışan yerli mətbuatı kəskin tənqid edib. Təcrübəli hücumçu baş məşqçi Tomas Tuxel və Cud Belligem arasında münaqişə olması barədə yayılan şayiələri qətiyyətlə təkzib edib.

Mayamidəki bürkü hava şəraitində baş tutan və əlavə vaxtda İngiltərənin 2:1 hesablı qələbəsi ilə başa çatan matçdan sonra baş məşqçi Tomas Tuxel komandanın oyununu tənqid edərək çoxlu texniki səhvə yol verdiklərini və bəxtlərinin gətirdiyini bildirmişdi. Dubl müəllifi Cud Belligem isə müsahibəsində bu cür ağır şəraitdə Holand, Edeqor və Sörlot kimi ulduzlara qarşı oynamağın asan olmadığını vurğulamışdı. Britaniya mətbuatı, xüsusilə “Sky Sports” bu açıqlamaları Tuxel və Belligem arasında “münasibətlərin gərginləşməsi” kimi qələmə vermişdi.

BBC-yə müsahibə verən Harri Keyn komanda yoldaşının müdafiəsinə qalxaraq jurnalistlərin qərəzli yanaşdığını bildirib: “Finiş fitindən cəmi 5 dəqiqə sonra, məşqçinin nə dediyindən belə xəbəri olmayan Belligemə bu cür sual verəndə onun nə cavab verməsini gözləyirdiniz? Böyük turnirlər zamanı millidə bu cür nifaq toxumu səpməyə çalışmaq artıq tipik ingilis düşüncə tərzinə çevrilib”.

Milli komandanın kapitanı faktiki vəziyyətin tam fərqli olduğunu vurğulayıb: “Əslində isə həqiqət tamamilə başqadır. Biz məhz birliyimiz – futbolçular, baş məşqçi və heyətin həmrəyliyi sayəsində bu mərhələyə qədər gəlib çıxmışıq”. Keyn Tuşelin açıqsözlü üslubunu yüksək qiymətləndirdiyini və alman mütəxəssisin komandanın mübarizə əzminə hər zaman dəyər verdiyini vurğulayıb: “O, nə düşünürsə, birbaşa deyir. Məhz bu səmimiyyət və tələbkarlıq onu yüksək səviyyəli mütəxəssis edir”.