UEFA Konfrans Liqasının II təsnifat mərhələsində “Zirə”ni iki oyunun nəticəsinə əsasən mübarizədən kənarlaşdıran (2:1) Estoniyanın “Payde” klubunun baş məşqçisi Tarmo Kink Sumqayıtdakı cavab matçından (1:1) sonra təəssüratlarını bölüşüb.

Estoniyalı mütəxəssis komandasının fədakar mübarizəsini və müdafiədəki intizamlı oyununu xüsusi vurğulayıb.

“Payde”nin baş məşqçisi matçdan sonra keçirilən mətbuat konfransında komandasının uğurunun arxasında xüsusi sirr olmadığını bildirib. O, futbolçularının son fitədək bir komanda kimi mübarizə apardığını və bunun sayəsində qarşıya qoyulan məqsədə çatdıqlarını vurğulayıb.

Mütəxəssis “Zirə”nin oyun ərzində böyük təzyiq yaratdığını etiraf etsə də, komandasının etibarlı müdafiəsi və qapıçısının inamlı çıxışının həlledici rol oynadığını qeyd edib: “Möhtəşəm qapıçımız və möhkəm müdafiə xəttimiz var. Futbolda belə oyunlar tez-tez olur. Rəqib üstün oynaya, daha çox hücum edə bilər, amma bu, hər zaman istənilən nəticəni vermir”.

Baş məşqçi tarixi uğura imza atdıqlarını desə də, bununla kifayətlənmək niyyətində olmadıqlarını bildirib: “Hazırda inanılmaz hisslər keçirirəm. Avrokuboklarda növbəti mərhələyə yüksəlməklə klubumuz üçün yeni tarix yazdıq. Amma əldə etdiklərimizlə kifayətlənmək olmaz. Məqsədimiz daha da irəli getməkdir”.