Kişi basketbolçulardan ibarət mllimiz AÇ-2029-un seçmə mərhələsində növbəti oyununu keçirib. Tahir Baxşıyevin baş məşqçisi olduğu kollektiv səfərdə Lüksemburq yığmasını gərgin mübarizədə 76:74 hesabı ilə məğlub edib. Matçın ən məhsuldar oyunçusu 19 xalla millimizin üzvü Kamran Məmmədov olub.
Bu qələbə sayəsində qrupda ikinci uğurunu qazanan yığmanın baş məşqçisi Tahir Baxşıyev qarşılaşmadan sonra fikirlərini bölüşüb: “Basketbolçular meydanda sona qədər döyüşdülər, əla mübarizə apardılar və nəticədə çox çətin, eyni zamanda vacib bir qələbə qazandıq. Bütün komandanı təbrik edirəm. Lakin arxayınlaşmağa vaxtımız yoxdur. Artıq indidən bütün diqqətimizi qrupun son oyununa yönəltməliyik. Doğma azarkeşlər önündə əlimizdən gələnin ən yaxşısını etməyə çalışacağıq”.
Qeyd edək ki, millimiz qrupdakı sonuncu və həlledici matçını iyulun 5-də, saat 17:00-da Bakı İdman Sarayında İrlandiya seçməsinə qarşı keçirəcək.v