Çempionlar Liqasının pley-off mərhələsində “Sabah”a rəqib olacaq Beer-Şevanın “Hapoel” klubunun mübarizədən kənarlaşdırdığı Serbiyanın “Srvena Zvezda” klubunda ciddi böhran və kütləvi dəyişikliklər dalğası başlayıb. Uğursuz nəticədən dərhal sonra baş məşqçi Deyan Stankoviç istefaya göndərilib, onu bu postda Albert Riera əvəzləyib. İspaniyalı mütəxəssis komandanın sükanı arxasına keçər-keçməz sərt qərarları ilə diqqət çəkib.

Çempionlar Liqası ilə erkən vidalaşma “Srvena Zvezda” üçün ağır maliyyə itkiləri ilə nəticələnib. Komanda bu mərhələdəki uğursuzluq səbəbindən təxminən 30 milyon avro gəlirdən məhrum olub. Klub yaranmış maliyyə boşluğunu qismən də olsa məhz oyunçu satışları hesabına kompensasiya etməyi planlaşdırır.

“Komandanın sərəncamında hazırda 33 oyunçunun olması həddən artıq çoxdur,” – deyə qəzet yazır. – “Riera ixtiyarındakı hər bir futbolçunu iş başında görmək, mövsümün sonuna qədər kimin xidmətinə ehtiyac duyub-duymadığına şəxsən özü qərar vermək istəyir. Əslində, gedənlərin sayı 10-dan da çox ola bilər, çünki baş məşqçi heyətin maksimum 23 nəfərdən ibarət olmasını hədəfləyir. Planlı və ya gözlənilməz ayrılıqların qaçılmaz olduğu birmənalıdır.”

Klubun direktoru Zvezdan Terziç də mövcud gərgin vəziyyəti gizlətməyib: “Heyətimizdə həddindən artıq çox futbolçu var. “Lill”i məğlub edən qrupdan başqa, məşqlərə qatılan digər əlavə oyunçularımız var. Biz bu yükü yüngülləşdirməli və bəziləri ilə vidalaşmalıyıq. Çempionlar Liqası, Avropa Liqası və ya Konfrans Liqasında oynamaq tamamilə fərqli maliyyə və idman reallıqlarıdır. Heç kim bizə avans olaraq pul vermədi, lakin biz bu problemi öz gücümüzlə həll edəcəyik”.