İngiltərə millisi dünya çempionatında qızıl medallar uğrunda mübarizə apardığı bir vaxtda, kral ailəsinin futbola münasibəti diqqət mərkəzinə düşüb. Böyük Britaniya Kralı III Çarlzın bu idman növünə heç bir marağı yoxdur. Bunu kralın oğlu, Uels şahzadəsi Uilyam etiraf edib.

Özü odlu-alovlu bir futbol azarkeşi olan Şahzadə Uilyam, NFL (Amerika futbolu) ulduzları Ceyson və Trevis Kelsi qardaşlarının təqdimatında yayımlanan məşhur “New Heights” podkastının qonağı olub. “Aston Villa” klubunun sadiq azarkeşi olan şahzadəyə “Futbol sevgisi sizə atanızdan keçib?” sualı ünvanlanıb.

Şahzadə Uilyam isə heç tərəddüd etmədən bu maraqlı cavabı verib: “Qətiyyən yox! Atam futbola nifrət edir. Bizim ailədə köklü futbol ənənələri yoxdur, demək olar ki, heç kim heç bir komandaya azarkeşlik etmir. Məndə bu sevgi dostlarımın məni ilk dəfə stadiona aparmasından sonra yarandı”.

Podkastda ABŞ və Avropanın idman mədəniyyəti, xüsusən də futbol fərqlilikləri müzakirə olunub. Şahzadə Uilyam Avropadakı futbol bağlılığının tamamilə fərqli bir səviyyədə olduğunu vurğulayıb: “Avropada kluba sədaqət elə bir həddədir ki, komanda azarkeşlər üçün ikinci bir ailəyə çevrilir. Bunun çox böyük emosional tərəfi var. Məsələn, “Aston Villa “ qalib gələndə həftəsonum dünyanın ən gözəl gününə çevrilir. Uduzanda isə, düzünü desəm, bazar ertəsi səhəri heç kimi görmək istəmirəm, depressiyaya düşürəm. Bu hiss günlərlə davam edə bilir”.