Azərbaycan Basketbol Liqasında (ABL) çempionluq mübarizəsi həlledici mərhələyə qədəm qoyub. Bu gün start götürən yarımfinal mərhələsinin ilk qarşılaşmasında turnirin iddialı kollektivlərindən olan “Sabah” doğma meydanda “Gəncə”ni qəbul edib.

Bakı İdman Sarayında baş tutan görüşdə paytaxt təmsilçisi ilk dəqiqələrdən üstünlüyü ələ alıb. Baxmayaraq ki, gəncəlilər ikinci və üçüncü hissədə rəqibə müqavimət göstərməyə çalışaraq fərqin böyüməsinə mane olublar, oyunun taleyi sonuncu hissədə həll olunub. “Sabah”ın final rübündəki sarsıdıcı oyunu (25:6) matçın taleyini erkən müəyyənləşdirib.

Qalib komandanın heyətində Castin Tilman nümayiş etdirdiyi məhsuldar oyunla gecəyə damğa vurub. O, rəqib səbətinə 25 xal göndərərək matçın ən sərrast oyunçusu adını qazanıb və komandasının darmadağında böyük pay sahibi olub.

Sabah” – “Gəncə” — 95:67 (29:21, 25:26, 16:14, 25:6)

Yarımfinal seriyasının digər ilk qarşılaşması sabah baş tutacaq. Bakı İdman Sarayında keçiriləcək növbəti matçda “Abşeron Layons” və “Neftçi” kollektivləri üz-üzə gələcək.

Komandalar arasında yarımfinalın ikinci oyunları aprelin 25-26-da keçiriləcək.