UEFA Çempionlar Liqasında ölkəmizi təmsil edən “Sabah” bu gün 1-ci təsnifat mərhələsinin cavab oynuna çıxacaq. Komandamız Uels çempionu “Nyu Seynts”in qonağı olacaq.

Bir həftə öncə “Bank Respublika Arena”da baş tutan ilk oyunda yaxşı təsir bağışlayan Valdas Dambrauskasın yetirmələri Velko Simiç və Kahim Parrisin qolları ilə 2:0 hesablı inamlı qələbə qazanaraq mərhələ adlamaq yolunda böyük üstünlük əldə etdilər.

Bu gün saat 21:30-da “Park Holl” stadionunda start götürəcək matçda bir həftə öncə olduğu kimi, “Nyu-Seynts” öz ənənəvi ev formasında – yaşıl-ağ zolaqlı köynək, yaşıl şort və corablarda çıxacaq. “Sabah” isə tamamilə qara rəngli geyimdə mübarizə aparacaq. Qapıçılar müvafiq olaraq tam sarı və tam bənövşəyi geyimlərdə yer alacaqlar.

Həlledici qarşılaşmanı İspaniyadan olan hakimlər briqadası idarə edəcək. Baş hakim Mateo Buskets Ferrer olacaq. Ona yan xətt hakimləri İnyiqo Prieto və Qonsalo Qarsiya Qonsales kömək edəcək. VAR otağında isə Valentin Qomes əyləşəcək.

Bakıdakı yenilgidən sonra revanş xəyalları quran Uels çempionu ev oyunlarındakı uğurlu statistikasına güvənir. Belə ki, “Nyu Seynts” ötən mövsüm “Park Holl”da keçirdiyi 21 matçın 18-də qələbə qazanıb və 1 dəfə heç-heçə edib. Uels təmsilçisi Ozuestridə keçirdiyi son 7 Avrokubok matçında isə cəmi 2 dəfə meydanı məğlub tərk edib. Lakin ilk oyunda tam üstünlük nümayiş etdirən “Sabah”ın cari forması komandamızın mərhələni adlayaraq yoluna davam edəcəyinə böyük ümidlər yaradır. Qeyd edək ki, qarşılaşma yerli “Sgorio” rəqəmsal platformaları vasitəsilə canlı yayımlanacaq. İki oyunun nəticəsinə görə üstün olan tərəf Çempionlar Liqasının 2-ci təsnifat mərhələsinə vəsqə qazanacaq.