“Real” FİFA-nın Klublararası Dünya Çempionatı və digər turnirlərin kommersiya hüquqlarını özəl investorlara satmaq planına kəskin tepki göstərib. “Kral klubu” rəsmi bəyanat yayaraq, beynəlxalq turnirlərin gəlirlərinin özəlləşdirilməsi ideyasına açıq şəkildə qarşı çıxıb. Klub, hüquqların mühafizəsində duran və bu təklifə vaxtında etiraz edən bütün tərəflərə təşəkkürünü bildirib.

Gərginliyə FİFA-nın gündəmə gətirdiyi, lakin futbol ictimaiyyətinin kəskin təzyiqindən sonra imtina etmək məcburiyyətində qaldığı “FIFA Forward Enterprise” konsepti səbəb olub. Planda Dünya Çempionatı və digər yarışların kommersiya aktivlərini idarə etmək üçün 20 milyard dollar dəyərində yeni şirkətin yaradılması nəzərdə tutulurdu.

FİFA bu layihə çərçivəsində səhmlərin 20%-ə qədərini kənar investorlara satmağı və təxminən 4.2 milyard dollar vəsait cəlb etməyi hədəfləyirdi. FİFA prezidenti Canni İnfantino 211 milli assosiasiyaya müraciət edərək sentyabrın 19-dək mövqelərini bildirməyi xahiş etmişdi. Hətta layihəni dəstəkləyən hər bir federasiyaya 40 milyon dollar ayrılacağı vəd olunmuşdu.

Təklif qısa müddətdə dünya futbolunda böyük böhrana yol açdı. UEFA-ya üzv olan 55 assosiasiyanın tamamı plan ləğv edilənədək FİFA turnirlərini boykot edəcəklərini bəyan etdi. Şimali və Mərkəzi Amerika (CONCACAF) layihəni kəskin tənqid etdiyi halda, Asiya Futbol Konfederasiyası (AFC) qərarların qəbulu mexanizminin dəyişdirilməsini tələb etdi. Birlikdə FİFA-nın 211 üzvündən 143-nü təmsil edən bu üç qitə konfederasiyasının birgə müqaviməti ali futbol qurumunu geri addım atmalı etdi.