“Real”in baş məşqçi postu ətrafında gərginlik artır. Joze Mourinyonun kluba qayıdışı an məsələsi hesab edilsə də, son saatlarda gündəmə gözlənilməz bir ad gəlib: “Barselona”nın keçmiş ulduzu Sesk Fabreqas. İspaniyalı mütəxəssis artıq məsələ ilə bağlı ilk açıqlamasını verib.

Hazırda İtaliyanın “Komo” klubunu çalışdıran Fabreqas, burada inanılmaz uğura imza atıb. Çempionatın bitməsinə iki tur qalmış komandasının avrokuboklara vəsiqəsini rəsmiləşdirən gənc məşqçi, hələ də Çempionlar Liqası uğrunda mübarizəni davam etdirir. Məhz bu uğur “Kral Klubu”nun diqqətini cəlb edib.

Cadena COPE kanalına müsahibə verən Fabreqas, karyerası ilə bağlı iddialara belə cavab verib:

“Heç bir klub qarşısında “qırmızı xəttim” yoxdur. Lakin hazırda yalnız məşqçi kimi inkişaf etməyə fokuslanmışam. Bu təkliflər barədə düşünməyə vaxtım olmayıb. Hazırkı klubumda özümü çox rahat hiss edirəm, çünki burada inkişafım üçün hər cür şərait yaradılıb”.

Fabreqas variantı maraqlı görünsə də, İspaniyanın nüfuzlu “AS” nəşri “Real”in əsas hədəfinin Joze Mourinyo olduğunu iddia edir. Məlumata görə, hər şey portuqaliyalı mütəxəssisin qərarından asılıdır.