İspaniya futbolunda tarixi hadisə baş verir. Dünya çempionu və ikiqat Avropa çempionu, əfsanəvi müdafiəçi Sergio Ramos, yetirməsi olduğu “Sevilya”nı almağa hazırlaşır. “Cadena SER” radiostansiyasının yaydığı son məlumata görə, ulduz futbolçu “Five Eleven Capital” holdinqi ilə birgə klubun hazırkı sahibləri ilə prinsipial razılıq əldə edib.

Mənbələr satınalma məbləğinin təxminən 450 milyon avro olduğu bildirilir. Hazırda Ramos və tərəfdaşlarının klubun maliyyə hesabatlarını və daxili audit sənədlərini analiz etmə mərhələsində olduğu qeyd edilir. Bu maliyyə yoxlamaları müsbət nəticələndiyi təqdirdə, yaxın vaxtlarda rəsmi sənədləşmə prosesinə start veriləcək.

39 yaşlı futbolçu üçün bu addım sadəcə bir biznes investisiyası deyil, həm də böyük mənəvi əhəmiyyət daşıyır. “Sevilya” akademiyasının yetirməsi olan Ramos, peşəkar karyerasında bu komandanın formasını iki fərqli və unudulmaz dönəmdə geyinib: 2004–2005-ci illər: gənc istedad kimi karyerasının parlaq başlanğıcı; 2023–2024-cü illər: uzun illərdən sonra kluba duyğusal və simvolik qayıdış.

Tarixi Karyera və “Sevilya”nın Yeni Ümidi

Xatırladaq ki, Sergio Ramos futbol tarixinin ən titullu oyunçularından biridir. O, “Real”ın heyətində 5 dəfə İspaniya çempionu və 4 dəfə Çempionlar Liqasının qalibi olub, PSJ ilə iki dəfə Fransa çempionluğu yaşayıb. İspaniya millisinin heyətində isə Dünya çempionu (2010) və ikiqat Avropa çempionu (2008, 2012) titullarını qazanıb.

Hazırda “Sevilya” La Liqada işləri yaxşı getmir, 21 oyundan sonar 24 xal toplayan komanda 11-ci pillədə qərarlaşıb. Azarkeşlər ümid edirlər ki, Ramosun rəhbərliyi altında klub həm maliyyə, həm də idman baxımından yenidən öz əvvəlki əzəmətinə qayıdacaq.